Hadei di yaok mbang raong meda salih labik var raong piah ginup tukvak ngak hacih saat

Meng labaih 3 ha cao su mek hu takik jien, meng bac magru ilamo di dom bruk raong glang dalam bhum saong di dom kỹ sư, thun 2017 saai Mà Văn Nguyên (daok di ấp Phước Tiến, xã Tân Phước, huyện Đồng Phú) buh jien tame raong ada ralaow Grimaud angaok thu, ba mai kein laba praong ka sang. Saai raong meng 4.000-5.000 drei ada. Tal urak ni, hadei di labaih 10 mbang saai pataom hu biak rilo ilamo saong ba jien tame tani tanat ka sang. Raong ada angaok thu pandar mblang taneh ala phun cao su, yaok 20 harei ba tame sa mbang 1.000-1.500 drei, tal 50 harei lac pablei hu, yaok drei ada trak meng 3,2kg tagok, jien buh tame 95-100 triệu đồng ka 1.000 drei. Tui yaom di yaok tukvak, 1.000 drei laba hu meng 25 triệu đồng tagok. Taphia di nan, khak di ada mek ngak khak hữu cơ siam ka taneh pala drak, meng nan nyu paglaong chất lượng saong năng suất katak di bien phun cao su.

Saai Nguyên brei thau: ada Grimaud hu asal meng negar France kayua Tập đoàn Grimaud lai tạo. Ni lac janih ada hu biak rilo ralaow, ralaow nyu kapal saong pahe bingi, praong samar, tukvak raong jaik 2 bilan lac pablei hu, lagaih haong bruk raong angaok thu. Bruk raong jeng biak mbuan, jien buh tame ngak var ro bier,  yaok ô 2.000 drei ngak abih 7 triệu đồng saong pandar hu labaih 5 thun. Hadei di yaok mbang raong meda salih labik var raong piah ginup tukvak ngak hacih saat, trun bruk njom ruak saong jien thú y... Yaok thun mayah raong gam gam ye meda raong hu meng 12 mbang tagok, pablei tabiak samu labaih 24.000 drei, jien mek tame oh takik jang 240 triệu đồng. Langiu di bruk mek tatak, yaok urang ngak meda raong meng 4.000-6.000 drei ada nan ye jien pah manuac raong ada lap. Pandar tukvak daok lahe di urang ngak dalam puk palei.

Piah raong hu siam ada Grimaud, langiu di pajaih siam, manuac raong njauk caik hatai tal var raong ginup lanieng lanoi, mbuan tathuak ia, hacih saai pametai anek ruak, brei mbang pandap mbang ginup ka dom drei ada saong pabak dinh dưỡng tui yaok drei, njauk khang jalan pacang caga ruak. Tui dom sang raong ada Grimaud, hadei di tuk mek ada mai njauk caik dalam var raong ngan haong nhiệt độ adit camriep lac 33-34^oC blaoh trun meneing tapa yaok harei. Tui langik tasik meda ba ada trun hadei di 10-15 harei pa-auk. Pandar vắc xin viêm gan ka ada manyum atau klauk tuk ada praong meng 1-3 harei, klauk vắc-xin jit aih traoh saong cúm manuk ada H5N1 tuk ada praong hu 10 harei saong 15 harei. Langiu di nan, njauk pandar jru pacang caga ruak piah caga dom janih ruak yau ye ruak aih traoh, ruak jalan suak yava, pabak vitamin srau saong jru bổ piah tagok prein pacang caga ruak, piah tagok kilo saong pacang caga ruak bại liệt atau tabuac bilau. Njauk caik hatai puh ramik haci hacih máng mbang menyum, pruh jru pametai anek ruak di var ro saong labik raong/.

Urang lang: Thu Thảo – 14/04