Urang nong hu bac megru ilamu rong limo palimek 

Tui takai urang jakar ngak nong  xã Hòa Sơn, khol hulin nao rivang trang trại di saai Trần Quốc Hùng, daok di palei Tân Hòa piah mboh anak meta kein laba kinh tế bo bruk ngak ba mai. Saai Hùng khan lac: Dom thun dahlau  kinh tế sang pagam pambak tame bruk pala tabau song bei plaom, langik tasik dak harei dak kan kandah, pablei oh tani tanat, bilan pala njauk, bilan oh hu  nan ye jien mek tame oh hu hadom.Tal thun 2016, tapa danak dak rong limo palimek di palei, sang saai hu dong phun jien piah blei  3 drei limo tano. Hadei di 6 bilan rong, saai pablei mbang camereip, laba hu labaih 20 triệu đồng.

Mong mboh kein laba di rong limo palimek ba mai, saai  Quốc Hùng nao duah blei dom drei lioi mai rong,  pala pabak 6 sào hareik, urak ni trại di saai  hu 20 drei limo tano palimek, dalam nan njauk sangka lac 6 drei pajaih ken Pháp. Tui saai  Hùng ye pajaih limo ni  brei hu rilo phun jien tuk vak rong dui atah, min pabak veik yaom pablei tabiak saong chất lượng glaong jang dut song pajaih  lai sind, ba bê, pajaih palei. Tui kuhria yaok drei hadei di  6-10 bilan iek glang, pablei hu laba labaih 15 triệu đồng.

Dreih yau saai Hùng, bruk ngak di ong Võ Thành Đạt, daok di palei Tân Lập jeng brei mboh dom siam lagaih jang dut song bruk rong meng kan, yau oh abih pren iek glang rong palao, abih takik tuk vak.Khan ka bruk rong limo,ong Đạt brei thau: Dahlau di abih val ro brei padang ngak khang kajap, lanieng lahơi, nền láng xi măng, máng mbang hacih saat. Pandap mbang jeng lac hareik chai, langui di nan, sang saai  dok pabak haleik asar, menyum ia sara lai parang  piah khik ginup dưỡng chất daong ka limo tagok kilo samar.Khak limo dok hu pandar piah pala njam patam, buh ka hareik biak siam. Dahlau deih rong palao,urak ni salih tapa rong tui jalan meteh  công nghiệp nan ye kein laba kinh tế glong jang. Urak ni , hu 9 drei, ong kuhria pablei di tuk Noel, jiak Tết tuk drak pasa blei rilo, kaoh abih phun jien dok veik  jeng hu labaih rituh triệu đồng.

Ong Đặng Hoàng Anh, Chủ tịch UBND xã Hòa Sơn brei thau: Urak ni, tong abih tapon limo dalam xã hu  1.675 drei. Bhap bini dalam xã hu mbaok tame dom danak dak rong limo palimek,limo menek, pasiam tapon limo dak harei dak rilo.Bahrau ni,meng phun jien di danak dak bruk ngak negar ka padang ngak palei pala bahrau ,xã hu dong  15 drei limo ka 15 boh sang kathaot,ngan song pok jien 299 triệu đồng.Tuk vak anak tal, xã Hòa Sơn hu peih prong bruk ngak ni,jak ba bhap bini buh jien tame ngak piah patagok kinh tế yam tagok tani tanat rai duik./.

Urang lang: Hanipha- 18/11