An Phú saong An Nhơn Tây, huyện Củ Chi nan lac dom xã daok rah tui kraong Sài Gòn, laghaih haong jalan patagok di bal raya ka bruk khai thác du lịch sinh thái rah tui jalan tapain kraong bal raya HCM. 

Kruac bhung kalik hijao nan lac janih baoh kayau hu yaom kinh tế glaong saong pablei hu tani tanat angaok darak pasar, yau nan min urak ini rầy kandong sauk  daok palai kaik bein phun hu pasiu (múi) saong piah pacang cakak jit palai kaik phun kruac bhung, njauk pala pablak haong phun drum ổi kayua tui dom urang roh duah, hala darum ổi meda patauk hu janih rầy ini. Tacei pato ilamu kỹ thuật pala kruac bhung kalik hijao haong darum ổi ka urang nong piah patagok pren khang di urang ngak bein, paglaong kein laba kinh tế, tacei pato ilamu mong iek, pacang khik phun pala, parilo janih pandap panda duh ka bruk du lịch sinh thái... 

Taphia di nan, pala  pablak haong phun uac ổi piah pacang khik phun pala, daong patagok kein laba kinh tế angaok sa mblang taneh dalam tukvak sang bein cang phun kruac bhung tabiak baoh. Hadei di labih sa thun ngak iek bruk ini (11-2017 - 12-2018), pasak pachreih nong bal raya HCM hu peih bruk taong yaom. Kruac bhung nan lac phun pala lavik thun, njauk tal thun ka 3 hadei di tuk pala meng hu baoh, kayua bahrau  ngak hu sa thun nan ye oh ka taong yaom hu ka năng suất, tok taong yaom ka cakrok patagok di phun.

Tui nan, mong rah tapa phun lagaih haong taneh riya, langik tasik di puk palei, phun cakrok patagok siam, diuk hu 94%, tabiak dhar rilo pakat 2, pakat 3. Daok dut haong kruac bhung, uac ổi cakrok patagok samar jang, jaik abih phun uac ổi di dom bein jeng hu tabiak baoh.

Tui ong Võ Văn Gò (ấp Ba Sòng, xã An Nhơn Tây, huyện Củ Chi, baoh sang hu mbaok tame bruk ngak ini), nan lac sa dalam dom baoh sang hu rilo thun pala kruac bhung, min tuk hu mbaok tame bruk ini saong peih ngak tui tacei pato di urang jakar pachreih nong, bein kruac bhung sang ong ctamuh siam (phun glaong jaik 2 m saong đường kính dhal jaik 1met 2 tấc). Kruac bhung lac janih phun takre aia, min meyah caik ka aia dauk ye mbuan metai, kayua yau nan ye ong Võ Văn Gò caong khin gah pachreih nong daong ka dom po ngak bein ngak hệ thống pruh aia, daong ilamu mong iek, peih prong mblang taneh pala kruac bhung mek hu kein laba jang dalam dom thun hadei./.