Bruk pala măng tây di saai hu dong ka rilo urang hu bruk ngak dalam palei 

Dahlau diah, meng 3 sào taneh cuah, sang sa-ai Hứa Văn Sắn pala rilo janih phun yau: akaok lasun, tỏi, amariak, sabei mbong, cà rốt... min năng suất biak biar.

Thun 2010, hadei di tuk hu mbaok tame tal pato pathram saong nao rivang iek bruk pala rabung hijao di dom puk palei, gam haong bruk daong ba di Kapul urang nong tỉnh saong karja puk palei, sa-ai Sắn kham merat pala iek sa 1 sào rabung hijao. Meng tari tareng saong ngak njauk ilamu, gam haong bruk pandar aia pruh patak pataom, phun rabung hijao tamuh siam saong brei năng suất glaong, yaok harei kaoh hu meng 7 - 10kg, pablei yaom 45 – 50 rabau đồng/kg, sang sa-ai mek jien tame hu meng 300 – 400 ribau đồng/harei. Sa-ai Hứa Văn Sắn – palei Tuấn Tú, xã An Hải, huyện Ninh phước khan lac: “Rabung ini jeng tui bilan, pagap yau bilan pandiak ye nyu karei, drei njauk mong iek ka nyu tani tanat, cakak dhar, dhan halei ruak drei njauk raong nyu”.

Mboh lac phun rabhung hujao ba mai kein laba glaong, sa-ai Hứa Văn Sắn peih prong mblang taneh pala tagok tal 3 sào, yaok bilan mek jien tame labaih 30 triệu đồng. Meng sa baoh sang kathaot, meng pala phun rabung hijao, sang sa-ai tabiak truh kathaot, padang ngak hu sang danaok siam gheih saong hu phun jien piah blei limo raong. Taphia di bruk cak rok patagok kinh tế sang, sa-ai Hứa Văn Sắn daok hu daong phun jien, pato tacei ilamu pala phun rabung hijao ka dom baoh sang kathaot, jaik kathaot di puk palei; ba bruk ngak ka 6 – 7 urang ngak ngan haong jien mek tame meng 2 - 2 triệu meteh sa bilan. Langiu di nan, sa-ai daok ngak đại lý blei rabhung hijao piah ba nao pablei di dom  tỉnh, bal yau: Tp.HCM, Lâm Đồng, Khánh Hòa… daong grap tanat bruk pablei tabiak ka dom baoh sang pala rabhung hijao di puk palei. Sa-ai Từ Công Ý – Phaok akaok Kapul urang ngak nong xã An Hải, huyện Ninh Phước ndom lac: “Sang sa-ai Hứa Văn Sắn dahlau diah hadiuk pasang lac sang kathaot di palei, blaoh hu dom pakat, dom gah sangka, yau danak dak rabhung hijao, pala rabung hijao hu daong ka sa-ai hu jien mek tame, langiu di bruk pala rabung hijao ye sa-ai daok blei phun rabung hijao, dom baoh sang jaik taphia nan dalam palei jeng ba rabhung hijao mai pablei, tui nan hu daong ka sa-ai hu jien mek tame, cak rok patagok bruk ngak mbang, tani tanat raidiuk”.

Meng tari tareng ngak mbang, kham merat yam tapa kan kandah, sang sa-ai Hứa Văn Sắn hu tabiak truh kathaot, hu jien mek tame tani tanat. Rilo thun gam, sa-ai mek hu angan urang nong ngak mbang naih jioy dom pakat saong hu Kapul urang nong Việt Nam pok meyaom lac “Urang nong ngak mbang naih gheih”./.

Urang lang: Jasi -27/1