Ikan bống mú

Akaok Kapul urang nong huyện Long Thành Trần Văn Thanh brei thau, dalam huyện hu rilo bruk raong pala kaya ikan dalam aia meteh mbak meteh taba yau: raong hadang di xã Tam An, raong ikan cá lồng di xã Phước Thái, raong hàu di xã Long Phước... Dalam nan, bruk raong ikan aia meteh mbak meteh taba angaok kraong di xã Phước Thái daok cakrok patagok biak siam.

Ong Nguyễn Tỉnh (55 thun, ấp 1C, xã Phước Thái) hu mong yau urang akaok meti dalam xã ngak bruk ini. Ong Tỉnh ngak lồng, blei ikan pajaih, mong iek, bac megru ilamu meng dom baoh sang raong di tỉnh Bà Rịa - Vũng Tàu. Hadei di tuk mek hu jak jeng siam mekre meng mbang raong iek camereip di thun 2011, tal urak ini ong Tỉnh cakrok patagok hu 25 lồng. Dalam nan, 7 lồng hu ong palao salih gauk dom  pajaih ikan yau ikan chẽm, bống mú, bớp, min rilo di abih nan lac ikan bống mú. Tui ong Tỉnh, ikan bống mú bhian diuk di labik tapen tasik saong labik pabah kraong, labik gaok gauk di aia mbak saong aia taba. Kayua yau nan ye, urang raong njauk palih ruah ikan pajaih hu taong mek meng kraong ribaong, atau pajaih ikan hu cakrok dalam ia meteh mbak meteh taba. Ngan haong dom urang raong hu ilamu yau ong ye  meda palih ruah ikan pajaih sit, janih 7 ribau đồng/sa drei piah abih takik phun jien buh tame. Daok khin “chắc ăn” ye palih ruah janih ikan prong jang hu yaom pablei meng 20-25 ribau đồng/sa drei pajaih piah raong.

Bilan thu (meng bilan 10 tal bilan 4 saka aia harei) nan lac tukvak raong ikan lồng angaok kraong siam di abih kayua takik hajan, aia oh salih karei, độ mbak tani tanat nan ye ikan takik ruak. Pandap mbang brei ka ikan bống mú biak mbuan duah, rilo meng lac dom janih ikan tạp, hadang, arieng sit. Meng tuk palao raong tal tuk mek pablei lac meng 6-7 bilan, yaok drei teik trak meng 1-1,5 kg.

Ong Tỉnh chreih chrai brei thau: "Thun blaoh dahlak pablei ikan hu 1,1 tỷ đồng, dalam nan jien buh tabiak jaik 800 triệu đồng. Thun ini bahrau pablei hu 2 mbang saong mek hu jaik 600 triệu đồng, vụ ikan Tết ini hu sản lượng glaong jang dua mbang". Meda ndom lac, bruk raong ikan lồng aia meteh mbak meteh taba angaok kraong lac mbuan ngak, ba mai kein laba nan ye meng dom baoh sang tuk akaok mereip, tal urak ini, xã Phước Thái hu labaih 40 baoh sang raong ngan haong mblang taneh tagok tal yaok pluh hécta. Abih di nyu lac, rilo sang dahlau diah caik halam njuan di kraong, jien duah hu oh tani tanat, urak ini khang hatai salih tapa raong ikan lồng saong duah hu yaok rituh triệu đồng jien laba yaok thun.

Langiu di pambak prong dom bruk raong pala kaya ikan dalam ia meteh mbak meteh taba hu siam mekre, gah ngak nong huyện jeng hu panuac kakei bhap bini raong rilo janih piah plaih bruk laik yaom, paliah jit ruak, takik brei pandar pandap mbang công nghiệp saong pasang iek jru kháng sinh dalam raong glang, pamaong tal cakrok patagok khang kajap./.

Urang lang: Jasi-11/12