Bac tamat đại học di  Ban raya Ho Chi Minh, min hatai caong khin ngak kaya meda angaok bhum palei di drei, sa-ai Nguyễn Hữu Nhơn mai veik palei lac ban sit Võ Xu, huyện Đức Linh piah padang mbang ngui. Tapa duah thau, sa-ai mboh baoh bao darang juk lac janih mbuan raong, laghaih haong langik tasik taneh riya di palei, jien buh tame ngak oh rilo, min ba mai kein laba glaong. Kayua yau nan ye sa-ai Nhơn khang hatai nao pah dom danao aia di mikva daok jaik taphia piah buh jien tame raong bao darang juk pablei rilow saong pablei pajaih siam ka mikva daok dalam saong langiu palei.

Thun 2019, sa-ai Nhơn padang labik raong bao darang juk piah pablei rilow. Kayua oh ka hu rilo ilamu dalam bruk raong, nan ye dom mbang raong akaok mereip baoh bao suai prong saong metai jaik abih. Khat lahik nan oh ngak ka sa-ai kadun likuk bo sa-ai daok kham merat roh duah, pataom veik ilamu tapa dom mbang raong iek bao darang juk saong mek hu jak jeng siam mekre.

Urak ini, sa-ai Nhơn hu jaik 7 ha mbaok aia piah raong bao darang juk pablei ralow, bao pajaih saong baoh bao piah ngak jru di ban sit Đức Tài saong ban sit Võ Xu, huyện Đức Linh. Sa-ai Nhơn brei thau: baoh bao darang juk pablei rilow raong jaik 4 bilan meda pablei hu. Yaok sa m2 palao raong 200 - 250 drei; teik trak 20 - 25 drei sa kg, yaom pablei urak ini lac 75.000 đồng/kg. Labik raong bao di sa-ai pablei tabiak darak pasar yaok harei 200 kg bao darang juk rilow.

Langiu di nan, sa-ai daok pabak brei pajaih bao ka mikva dalam palei raong. Tui nan, sa-ai caik tabiak jaik 20 m2 piah raong bao pajaih; yaok sa m2 meng 70 - 100 drei bao amaik ame. Yaok harei bao mebaoh jaik 400 tal 500gam; kuhria tapa, yaok sa kg baoh bao juk caih tabiak 12.000 drei pajaih. Sa-ai Nhơn khan lac: dom drei bao pajaih hu mong iek biak tani tanat, hadei di tuk baoh caih jaik 15 harei nan lac ba pablei hu. “Dahlau diah, kayua oh ka hu ilamu pabam, baoh caih tabiak tok hu labaih 50%, min urak ini baoh caih tabiak hu labaih 90%. Kayua hatai caong khin bao darang juk dak harei dak rilo, nan ye yaok bilan mblang bein di dahlak meda pabak hu pajaih bao darang juk ka labaih 150 baoh sang dalam saong langiu palei, kuhria rah tapa yaok baoh sang meng 20.000 – 50.000 drei bao pajaih, ngan haong yaom pablei 300 đồng sa drei”.  

Jeng tui sa-ai Nhơn: Bao darang juk oh mbang haleik công nghiệp, pandap mbang brei ka nyu tok hu dalam langik tasik yau hareik, dom janih bèo, baoh yein, baoh kadaoh, baoh ploi… Mblang bein di sa-ai bhian caik hatai tal bruk raong bèo tấm piah pabak pandap mbang ka baoh bao. Urak ini, sa-ai daok caik labaih 60% mblang taneh mbaok aia piah raong bèo ngak pandap mbang ka bao. Jalan ngak ini oh lac tok pabak brei pandap mbang hacih, oh njaom mbak hóa chất bo daok patak pataom hu pandap mbang, patagok kein laba di  bruk raong baoh bao juk di sa-ai.

Jalan ngak ini di sa-ai hu mong lac bahrau di puk palei, kein laba oh lah hagait dut haong dom labik karei. Sa-ai Nhơn jeng lac urang akaok meti peih ngak bruk ini, peih tabiak jalan ngak mbang bahrau dalam bruk cak rok patagok  kinh tế di huyện Đức Linh./.

Urang lang: Jasi – 15/12/2021