Ia danko ini nyu yamen la-an, saong patham hasit, hu chất dinh dưỡng glaong jang

Hu sa mbang, saai Nguyễn Hữu Trực mboh dalam bein sang drei hu 1 sruh danko biak karei ka oh bhian mboh, dalam sruh hu rilo ia danko saong ia biak ma-mbeik. Tuk nan, ka oh thau nan lac janih danko hagait min saai tava hasit mboh nyu biak bingi, pahe. Tapa roh duah, saai Trực thau ini lac danko dú, lac janih danko glai, nyu sit jang danko mật, abih di nyu nan lac nyu oh hu gai dut., oh klaak sruh nao labik karei saong oh abih rilo labik piah raong. Mboh ni lac janih danko karei jang dom janih danko raong mek ia daok pablei di darak pasa, saai Trực khang hatai buh prein piah raong.

Gam ngak gam duah thau angaok harak, báo, hadei di rilo mbang ngak iek thau hu bruk caih mebaoh, praong tagok di danko ini, saai Trực peih bruk raong rilo danko dalam sang. Piah ngak sruh ka danko, tok ngak dom thung kayau thông sit parabha jeng 3 tal piah danko caih, menaoh,  khik caga keo danko, ia danko saong phấn danko, daok gah ala mbat cao sa gilaong sit pagam nding katak lamin tapa danieng sang piah danko par tame, tabiak. Meng di tuk danko dú chúa caih baoh tal tuk jeng danko praong labaih 50 harei. Yaok sruh danko 1 bilan meda caih baoh 1 mbang, yaok mbang caih tabiak sa danko chúa bahrau saong caih baoh biak samar, brei ia hadei di 3 tal 6 bilan. Meng 3 tapon danko tuk camereip, hadei di 3 thun sang saai Trực tagok hu  labaih 400 tapon danko.

Bruk njauk biai di janih danko ini, lac oh mbang saradang  bo tok njuk catai bingu nan ye ia biak bingi, tamo. Ia danko ini nyu yamen la-an, saong patham hasit, hu chất dinh dưỡng glaong jang dom janih ia danko karei, nan ye hu rilo urang takre. Meng akaok thun tal ini, saai Trực pataom tame jhul khang bruk ngak pajaih danko nan je bruk mek ia danko hu labaih 100 lít; pambuak haong bruk pablei ia danko, pablei thung pajaih danko, phấn danko, keo danko tamo mek hu labaih 960 triệu đồng. Kaoh abih jien buh tame, saai Trực daok laba hu labaih 770 triệu đồng.

Tui saai Trực, meng mblang taneh praong 30m2 meda raong hu meng 400-700 tapon danko, oh cang brei mbang, oh abih rilo prein iek glang, bhap bini meda raong di dom bein phun, bingu tameh eng vil tamdar sang, pambuak haong bruk raong limo, pabe, pabo piah patagok kein laba.

Daok bruk ngak di anak tal, saai Nguyễn Hữu Trực daok roh duah jalan ngak ka nyu mekre meta, pablei dom sruh raong danko "biak ghieh mata” piah gam raong gam mek ia gam ngak jeng labik mekre meta ka mblang taneh di langiu langik, buh jien tame peih praong bein raong, padang angan je, yaih khan saong pambuak haong dom sang bein, dom nông trại, bein pala phun mbang baoh piah pablei atau brei pah danko piah thụ phấn salamat tui jalan lac “eng drei raong danko mek ia salamat di sang”; pambuak haong dom baoh sang raong danko ini pandang hợp tác xã danko, piah daong gauk gah ilamo, paglaong chất lượng, padang angan je saong tani tanat bruk pablei tabiak ka ia danko. Saai Trực jeng halain hatain tacei pato ilamo raong danko oh mek jien ka bhap bini di pak ini saong dom urang raong danko daok atah tapa dom website, mạng xã hội.

Saai Lưu Xuân Vũ, Phó Bí thư Tỉnh Đoàn Ninh Thuận brei thau, ini lac bruk raong danko biak siam haong langik tasik saong khang kajap haong alam, brei tabiak ia danko meng langik tasik, rik daong khik caga dom janih sinh vật. Bruk raong danko ini oh abih rilo jien padai saong prein manuac ngak, hu kein laba glaong. Dom urang ranaih umo atau dom baoh sang di rilo palei karei dalam tỉnh meda pandar bruk ngak ini piah paglaong jien mek tame, cak rok patagok kinh tế baoh sang./.

Urang lang: Thu Thao – 22/12