Bruk raong athur palao di bhap bani jeng meda ngak ka jit tamuh khang 

Hadei di tuk tỉnh Lạng Sơn tabiak panuac lac hu jit ruak di kreh bilan 10 di huyện Hữu Lũng ye di tỉnh Cao Bằng, jit hu mboh akaok mereip di sa palei jaik tapen negar di xã Lý Quốc, huyện Hạ Lang meng puac bilan 10. Tal urak ini, jit hu mboh di 13 xã dalam 4 huyện ngan haong jaik 200 drei kubao njaom ruak, dalam nan hu jaik 20 drei metai.

Meyah di huyện Hạ Lang jit njaom mbak meng xã ini tapa xã karei saong huyện hu tabiak panuac lac hu jit dalam huyện ye jit jeng daok hu di xã Phi Hải, huyện Quảng Hòa – sa bhum taneh daok atah dut haong dom bhum taneh hu jit karei saong baoh sang hu jit jeng oh hu pajeng ba athur tame tabiak bhum palei ini dalam tuk vak tapa. Ong Hoàng Minh Đạt, akaok Chi cục pala drak saong raong glang brei thau: "Makna tamuh tabiak jit jeng oh ka thau  meng halei mai. Jit ruak oh njauk lac di sa bhum taneh atau sa labik bo urak ini nyu nyaom mbak tabiak atah tal huyện Hòa An nan lac labik dalam taneh ia, atah labik hu mboh ruak aakok meti di huyện Hạ Lang lac labik jaik taphia tapen negar".

Harei 11/11, Bắc Kạn lac tỉnh ka klau hadei di Lạng Sơn, Cao Bằng hu ruak laka pandung klik kubao limo di 2 baoh sang raong daok di xã Hiệp Lực, huyện Ngân Sơn. Njauk caik hatai lac taong abih 2 baoh sang ini dalam thun ini oh blei athur bahrau. Van limo 17 drei di sa baoh sang raong njauk ruak di palei Bó Lếch atah di jalan roya 3 meng Cao Bằng mai Bắc Kạn tok jaik 100m. Yau nan min, bruk labik jaik abih hu jit di truh xã Dân Chủ, huyện Hòa An, tỉnh Cao Bằng, atah di nan jaik 100 km saong yam tapa dom labik hu raong rilo kubao limo karei jeng brei mboh kadha kan thau dahlau di jit ruak ini.

Anak meta mboh lac biak kan si thau ka jalan njaom mbak, taphia di nan urak ini jeng oh ka thau hu asal njaom mbak ruak di taong abih 3 puk palei. Bruk njaom mbak hu mboh lac tapa dom jalan yau njaom mbak tapa taom gaok tapak, tapa pajeng ba, atau tapa jamaok, aruai, abih di nyu lac janih aruai kubao atau daok iew lac mòng trâu, lac janih meda par atah hu tal dom km. Kayua yau nan ye, jalan ngak piah pacang caga ruak siam di abih tuk ini nan lac bruk bhap bani njauk ngak siam bruk puh ramik van ro ka nyu haci hacih saong hu dom jalan pacang caga jit karei. Ong Đỗ Xuân Việt, akaok Chi cục Raong glaong saong Thú y tỉnh Bắc Kạn kakei lac:"Tapa vaktu pasang iek jit ruak, khaol dahlak taong yaom lac jit ruak ini meda njaom mbak biak khang, abih di nyu lac daok tame bilan aruai kubao daok patagok. Kayua yau nan ye, khaol dahlak daok pataom tame pachreih dom baoh sang raong glaong, abih di nyu lac rah tui jalan roya njauk caik hatai sangka, abih di nyu lac caik hatai tal jru pacang cakak pametai anek aruai kubao, ka dua puh ramik hacih van ro, ka klau lac brei mbang pabak rilo pandap mbang, abih di nyu lac dalam bilan la-ar piah patagok pren pacang caga ruak ka  athur raong".

Hadei di tuk dom puk palei peih bruk pacang padam jit, padang dom labik pasang iek bruk pajeng ba di dom labik hu jit, ye bruk njaom mbak di jit ruak daok trun. Yau nan min, bruk pajeng ba, pablei salih athur jeng daok hu peih ngak di dom bhum taneh oh hu jit, kayua yau nan ye, mbuan rah tabiak bruk njaom mbak. Abih di nyu lac angaok dom puk palei jeng daok hu dom baoh darak pablei salih limo kubao prong, mei meng rilo puk palei karei di gauk. Bruk raong athur palao di bhap bani jeng meda ngak ka jit tamuh khang tuk halei jeng hu. Taphia di bruk ba tangin tame bruk di dom pakat dom gah, bruk eng drei ba tabiak dom jalan ngak piah khik caga tapul athur raong di yaok bhap bani nan jeng lac bruk caong khin njauk ngak/.

Urang lang: Jasi -25/11