Ong Sơn khan lac, thun 1999, sang ong bahrau ngak randap haong bruk raong hadang sú, tuk akaok mereip raong takik. Yau nan min, thun 2005, dom baoh sang raong hadang di Ninh Thuận gaok biak ralo kan kandah, kayua hadang sú njauk ruak khak mbong metai ralo. Tuk nan, ralo sang raong njauk khat lahik. Dom sang njauk klaak danao saong duah jalan ngak mbang karei, sang ong Sơn jeng lac sa dalam dom sang nan. Hadei di ralo melam saneng, thun 2006, ong ngak pasiam veik danao salih tapa raong hadang thẻ takai mbong. Biak patuah hadei di labaih 3 bilan raong, ngan haong mblang taneh 2ha hu ba mai kein laba 200 triệu đồng”.

Hu jien, ong blei dom mblang taneh klaak saoh saong nao tal dom baoh danao blei veik dom sruh mac menyek klak bo mikva pablei lap piah duh ka bruk raong hadang. Dom thun hadei, bruk raong hadang hu siam laghaih jang, yaom pablei glaong nan ye jien mek tame jeng hu ralo jang. Yaok thun ong blei meng 2 tal 3ha, patagok mblang taneh raong hadang jaik 50ha. Urak ini, kuhria rah tapa năng suất hu meng 12 – 15 tấn/ha, yaom pablei meng 110.000 – 150.000 đồng/kg, kaoh abih phun jien buh tame yaok thun ong laba hu jaik 30 tỷ đồng.

Dut haong dom baoh sang raong pala kaya ikan karei, ong Sơn hu jien mek tame ralo jang, lac urang nao dahlau dalam bruk pandar khoa học tame raong hadang. Bhap bani dahlau diah bhian raong hadang tui jalan klak tok raong dalam 2 – 2,5 bilan ye mek pablei. Jalan raong ini oh kein lagaih, sản lượng tok hu 100 con/kg, ba tal jien mek tame di urang raong oh glaong. Ngan haong ong Sơn, ong raong dui atah tukvak jang 3 bilan meng mek pablei, sản lượng meng 50–60 con/kg. Piah ngak hu bruk ini, kadha praong abih lac njauk pasiam hu môi trường dalam danao ka nyu hacih, juai caik ka nyu ô nhiễm. Jalan nao khang kajap ini hu daong ka ong jak jeng dalam ralo thun tapa. Hadei di tuk raong hu siam mekre, yaok pluh baoh sang di puk palei, dom baoh sang di labik karei tuh mai bac megru ilamu kỹ thuật saong raong hadang mek hu kein laba glaong.

Ong Sơn brei thau, tuk langik pandiak, piah ka hadang cakrok patagok siam, njauk brei ka hadang mbang lagaih haong hadang praong atau sit, raong ralo atau takik, trun 15 - 30% dom pandap mbang dalam dom harei pandiak. Yaok 10 -15 harei/ sa mbang pabak vitaminC, khoáng vi lượng. Pandar men tiêu hóa srau tame dalam pandap mbang ka hadang, dalam tukvak yaom mbang meng 5 - 7 harei piah patagok pren  pacang caga ruak, daong ka hadang laok kanduh samu gauk saong samar khang kanduh. Pandar dom janih chế phẩm dalam yaok 10 - 15 harei sa mbang piah pasiam aia saong mbat danao raong, daok pandar hadom ye tui tacei pato di labik ngak tabiak;

Taphia di nan, bhian nao pasang iek, ramik veik saong khik ramik dom yếu tố môi trường tui njauk quy định saong tui tacei pato di urang jakar chuyên môn. Khik ramik mbaok aia dalam danao biar di abih meng l,3 - l,5m, meyah khin pabak aia ye njauk mek aia tame dalam tukvak ramik veik, tapa túi lọc, ba tame danao karei, xử lý dahlau di tuk ba tame danao raong; Taphia di nan, khik iek catang bruk patagok di tảo, abih di nyu lac dalam tuk langik pandiak. Tuk tảo tagok khang (sambo màu aia hijao jhuk) meda pandar dom jalan ngak ka nyu laghaih piah pametai tảo.

Langiu di bruk raong hadang, ong Sơn daok peih đại lý pablei salih pandap mbang ka hadang. Sa gah caga hu pandap mbang, gah karei daong ka mikva dalam palei bayar radeic bo oh mek jien jhung. Blaoh ong daok tacei jalan raong hadang ka dom sang oh ka thau ilamo kỹ thuật raong hadang. Ong Sơn hu ngak brei pamedeih bruk raong hadang di mikva labik ini, tal harei ini hu labaih 100 baoh sang di xã Phước Dinh daok raong hadang veik saong raong praong.

Kadha urang ngak hamu caong thau adit ini tal ini likau padeih. Kadha ini kayua Rayo sap ndom VN pambuak haong pasak pachreih nong negar  ngak.