Pasak dịch vụ ngak nong huyện Bù Đốp pala iek pajaih padai ST24  

Thun 2019 pajaih padai ST24 hu pasak dịch vụ ngak nong huyện Bù Đốp pala iek 5ha saong mek hu năng suất glaong. Thun 2020 hu 20 baoh sang urang nong palih ruah pajaih padai ST24 pala angaok mblang taneh 10ha yuak hu 6-7 tấn/ha. 

Bilan hè thu thun ini sang ong Vũ Khắc Tăng daok di ấp 4, xã Hưng Phước salih tapa pajaih padai bahrau angaok mblang taneh jaik 0,4ha saong padai tamuh biak siam. Ong Tăng brei thau: “Hadei di tuk thau pajaih ST24 hu Pasak dịch vụ ngak nong huyện pala iek ba mai kein laba glaong, khaol dahlak salih tapa pala pajaih padai ST24. Tal harei jaik yuak, mboh pajaih ini hu tangi padai prong, asal atah, tamuh siam laghaih haong taneh riya di labik ini”. 

Tui ong Tăng, tuk trun pajaih ST24, rilo sang tuk camereip mboh phun sit, bahrau drak mboh pahe nan ye huac halak halin palai kaik dalam vaktu meng 1-7 harei. Yau nan min, hadei di tuk mikva ngak njauk tui panuac kakei di Pasak dịch vụ ngak nong ye padai tamuh biak samar. Bloh hadei di nan mikva mboh pajaih ini hu asal rilo jang dut haong dom pajaih dahlau diah. Meyaih pajaih klak yuak hu meng 3-3,5 tấn sa ha, ye pajaih  ST24 mek hu labaih 6 tấn sa ha. 

Daok ong Đỗ Xuân Thân jeng daok di ấp 4, xã Hưng Phước brei thau: “halak halin palai kaik jeng takik jang dahlau meng tuk pala drak tui jalan hữu cơ siam mekre hacih sa-at. Abih di nyu lac, pajaih padai ST24 siam jang dom janih padai dahlau yau tanyi padai biar jang hala nan ye plaih hu halak halin palai kaik. Khaol dahlak bui sambai jang nan lac padai ST24 hu labik blei  yaom glaong jang dom janih padai dahlau diah”.  

Ong Thân daok khan lac “Tuk camereip pala pajaih padai bahrau, tuk ngak taneh khaol dahlak pandar dom janih men, dom bimao đối kháng piah pasiam taneh ye takik hu halak halin. Tuk mboh hu halak halin khaol dahlak pandar jru hu asal meng sinh học piah ngak brei asar brah hu siam”. 

Urak ini hu rilo sang salih tapa pala pajaih ini, meyah ngak pajaih ST24 njauk tui jalan ba tabiak ye mikva laba hu 120 triệu đồng sa vụ..  Dom sang pala pajaih ST24 hu Pasak dịch vụ ngak nong huyện Bù Đốp tacei pato pandar khak drak, pacang caga halak halin palai kaik tui jalan siam mekre hacih sa-at, daong tacei ilamu pala drak, iek glang padai. Langiu di nan, ngan haong mblang taneh prong, meyah mikva ngak njauk tui jalan ba tabiak, njauk pajaih, saong abih di nyu lac pandar tui jalan hữu cơ siam mekre hacih sa-at meda ngak jeng angan je brah bangi. /.

Urang lang: Jasi – 21/10