Rilo urang bac ilamu pala padai siam 

Bilan padai đông xuân 2020 - 2021, Doseco hu peih bruk pala iek pajaih padai OM468 di rilo labik karei di gauk dalam bhum taneran kraong CL saong Đông Nam Bộ piah taong yaom ka pajaih padai ini. Tapa taong yaom di urang nong pala iek, pajaih padai ini takik halak halin, brei rilo padai brah, hu urang pablei salih saong Cty pandap mbang taduan blei, brah ginup tiêu chuẩn pablei tabiak negar langiu.

Amuk Nguyễn Thị Oanh, Phaok Yam ndok balai ngak iek An Phong brei thau: pajaih padai OM 468 hu Kapul ThaiBinh Seed saong Doseco pala iek di bilai meng rilo vụ. Daok bilan hè thu thun ini, labik ini hu pala pajaih OM468 urak ini hu jaik 30 harei padai hijao that, mbu praong saong abih di nyu lac padai tal tukvak ini oh ka mboh hu halak halin.

Ong Lê Phương Quan daok di xã Châu Khánh, huyện Long Phú (t.Sóc Trăng) khan lac, bilan đông xuân 2021 meng blaoh hu nao ravang iek bruk pala pajaih padai OM468 di xã Khánh Lâm, huyện U Minh Hạ (Cà Mau), sa bhum taneh lakhun, padai sraoh blaoh oh mbơm hu aia tame hamu kayua aia njaom lakhun trak, min padai jeng daok that hijao. Ong Quan ndom lac pajaih padai OM468 sraoh tangi padai biak mekre, prong atah, asar padai khang biak rilo, padai tasak tal tuk yuak min hala jeng daok mekre, sambo kanyik katam, oh thu hala yau dom pajaih padai karei, năng suất glaong jang 30% duk haong ngak iek. Kayua yau nan ye bilan hè thu 2021, ong khang hatai pala iek 9 ha pajaih OM468, urak ini padai OM468 di sang ong Quan pala hu 20 harei, phun prong, hala siam, mbu tamuh khang.

Daok sa-ai Phạm Vũ Quốc Bảo, daok di xã Tân An, huyện Tân Hiệp (Kiên Giang) brei thau: Bilan hè thu thun ini, sang sa-ai palih ruah pajaih OM468 tapa Cty Cổ phần Tập Đoàn ThaiBinh Seed hu rilo mbang peih ngak iek dom bruk pala padai di xã. Mboh padai hu năng suất glaong nan ye sa-ai palih ruah pajaih padai ini piah pala angaok mblang taneh 5 ha. Urak ini padai OM468 di sang sa-ai Bảo pala hu labaih 50 harei tamuh biak siam, phun khang, hala dang tapak that hijao saong abih di nyu lac tal tukvak ini sa-ai bahrau pruh 2 mbang jru pacang caga halak halin.

Tui sa-ai Bảo, pajaih padai OM468 mboh njauk hatai di abih nan lac takik jien blei khak saong jru khik caga phun pala meng 15-20% dut haong dom pajaih padai karei. Tui kuhria mboh di sa-ai, dahlau diah tuk daok pandar dom pajaih padai karei, di vaktu meng 50 - 55 harei pala, njauk buh khak meng 60 - 65 kg sa công (1.300 m2), daok urak ini pala padai OM468 sa-ai Bảo tok buh 42 - 45 kg sa công min padai jeng that hijao, takik hu halak halin. /.

Urang lang: Jasi -7/7