Ong Đỗ Văn Thảo (daok di ban sit Phước Dân, huyện Ninh Phước) lac sa dalam dom sang camereip abih dalam palei pandar hu siam bruk pacang halam ka jaik 1 ha meda khan brei thau, dom thun dahlau, ruồi vàng mbang baoh saong halak palai kaik ngak ka sản lượng medar trun takik, hu tuk paik hu 1 tấn medar min klaak meng 3 tal 4 tạ kayua baoh nyu bruk, khut.

Min tukvak jaik di ini, ruồi vàng nyu caih biak rilo, pruh jru min oh pametai abih hu. Kayua yau nan ye, salih ka bruk blei jru khik cag aphun pala, sang ong nao blei halam mai pacang mejam medar, gam pacang hu ruồi vàng saong dom janih halak halin, gam khik caga hu pren yava kayua oh pruh jru, pabak hu bruk pala meda baoh hacih nan ye yaom medar pablei meng nan jeng glaong jang.

Tui dom sang pala medar brei thau, yaom jien blei halam pacang meng 12 tal 20 triệu đồng ka 1 sào medar, tukvak pandar halam meng 3 tal 5 thun tui halam, tui lingik pandiak rilo atau takik.

Bruk pandar halam pacang côn trùng vil val bein medar ba mai rilo siam lagaih, nan lac: Halam pacang hu côn trùng par tame, abih di nyu nan lac ruồi vàng mbang baoh, takik pandar jru khik caga phun pala nan ye baoh meda haci hacih, siam mekre.

Lingiu di nan, halam nyu ngak brei ia harei takik pasang tapak tame baoh medar, daong ka baoh takik sanam kanduh saong sậm sambo. Halam daok pacang hu ia kakua, caga hu ngin ngak jruh hala, jaoh dhar, hajan ngin ngak brei jruh baoh. Di bein medar oh hu halam pacang,  baoh paik hu meng 35 – 40 tấn sa hecta sa thun, dalam tuk nan, bein medar pacang halam hu năng suất meng 70 – 80 tấn sa hecta sa thun.

Medar urak ini lac sa dalam dom janih kaya nong di tỉnh Ninh Thuận, dalam tỉnh urak ini hu labaih 1.000 ha medar hu pala rilo di dom huyện Ninh Phước, Ninh Hải, Ninh Sơn saong ban sit Phan Rang – Tháp Chàm. Hu thau, urak ini hu labaih 10 ha medar daok pandar halam piah pacang. Medar Ninh Thuận tuk tasak kanduh salih tapa sambo katam blait, mbang mboh racam, yamen la-an.

Ong Phạm Dũng, Akaok Chi cục Pala drak saong khik caga phun pala tỉnh Ninh Thuận brei thau, bruk pandar halam pacang ka bein medar gam khik caga phun pala, gam patagok năng suất, chất lượng baoh medar, nan ye yam pablei jeng glaong jang.

Lingiu di bruk ngak sang halam pacang côn trùng ka phun medar, mikva urang ngak nong jeng meda ngak halam pacang ka dom janih phun pala, phun mbang baoh karei piah pacang caga halak halin, rik daong paglaong năng suất saong chất lượng baoh, paglaong jien mek tame/..