Saai Lê Ngọc Cường, Yam ndok HTXA8 taphia bein nho pala dalam phein

Urak mi bein phun nho dalam phein  di HTX A8 hu labaih 2.000 phun nho rilo pajaih karei di gauk, yau ye: Nho bhong (Red Cardinal), nho NH01-152 hu pagam di mangaok got nho tamuh di gilai piah parilo janih phun nho, patagok prein dui pachreih manuac blei. Phun nho hu mbeik thaik phong thủy tui gai pandok, tui saai Cường ye yaok thun ngak gai pandok gul vil, min thun ni saai salih tapa mbeik tui biểu tượng di Ninh Thuận lac blah pin năng lượng ia harei. Tui umur thun, yaok phun nho dalam phein  brei baoh rilo atau takik karei di gauk, piah hu sa phein phun nho ghieh mata ye meng di tuk phun tamuh khang kajap hu ba tame phein pala, mbeik thaik, katek meng gai inox, blaoh cakak dhar, buh khak, pruh ia… hadei di labaih 2 bilan iek glang kuhria meng tuk tuk cacak dhar ye phun nho tabiak bingu, ndam baoh. Yaom yaok phein phun nho meng 500 ribau dong tal 5 triệu đồng. Dom got phun nho lavik thun saong thaik mekre mata bhian hu manuac sia kakei blei dahlau saong hu yaom glaong jang. Kuhria ta-eng thun 2019, kaok abih phun jien buh tabiak ye HTXA8 mek tame hu labaih 1 tỷ đồng, ba bruk ngak ka 12 urang dalam palei saong yaom jien mek tame tui kuhria meng 4 - 5 triệu đồng/ sa bilan.

Khan brei khol dahlak thau ka dom kan kandah tuk ngak nho dalam phein, saai Lê Ngọc Cường, Yam ndok HTXA8 brei thau: Pala phein nan ye bruk iek glang phun nho kan jang, bo kan di abih lac tukvak ngak tabiak baoh kayua prein pacang caga ruak di phun pala dalam phein takik jang,  nan ye njauk hu tabung pacang khik caga bingu nho saong ngak habar piah ka baoh tabiak njauk tukvak tết. Daok phun nho pala langiu taneh ye sa thunpaik baoh 3 mbang min phun nho dalam phein  dalam phein 1 thun meng tabiak baoh. Min pabak veik, nho dalam phein  tok pandar khak hữu cơ, oh pandar jru hóa học nan ye takik abih jien pruh jru, daok jien buh tame ngak jeng takik jang meng 4-6 mbang dut saong pala yau bhian mboh, ba mai kein laba glaong. Urak ni, HTXA8 pablei phun nho dalam phein  ka labaih 30 tỉnh, ban saong meda peih praong tabiak tal taong abih dom  tỉnh, ban dalam taneh ia.

Taphia dom janih phun bingu pala piah iek meng kan mai yau ye đào, mai, quất, cúc…urak ni urang blei daok hu pilih ruak bahrau, nan lac phun nho dalam phein . Phein nho dalam phein  Ninh Thuận ba mai bruk ghieh mata ka oh bhian mboh, daong ka bhap bini duah hu jien tame tani tanat, peih tabiak jalan nao bahrau dalam bruk pala phun nho di dom urang ngak bein daok pak ni.

Ông Huỳnh Ngọc Du, akaok UBND xã Phước Thuận (h.Ninh Phước) brei thau:  HTXA8 daok padang mô hình Palei nho rivang iek di Phước Khánh (Ninh Phước) saong mada hu peih tabiak raok tuai di puac thun ni, praong abih tih jaik 53ha, HTXA8 buh tame labaih 4 tỷ đồng, mblang bein palei nho meda parang iek labaih 10.000 phun nho dalam phein  pajaih bahrau saong raok tuai rivang iek meng radaih điện tuk mai rivang main di mblang bein palei nho, ngan saong rilo bruk chreih chrai./.

Urang lang: Thu Thảo – 02/12