Urang nong bangsa takik pala pablah tame phun mbang boh 

Saai Huỳnh Hữu Quyền brei thau: “Hulin tui iek khaw tin ka dom bruk pakacah ngak mbang ngak huak, dalam mbang pakacah “mbaik cung meh  thun 2015” mboh dom urang ngak mbang huak pandar janih gia vị lac  phun sọ chó bo palei di hulin tamuh biak rilo. Tapa duah thau, phun  sọ chó bhian hu pandar  piah pandam rilaow, gia vị ka pandap mbang. Hala nyu hang min tuk riak haong cari  mboh biak mbak carak ”. Meng nan, saai  Quyền khang hatai duah janih phun ni  ba mai pala .

Saai  Quyền blei veik song pah mblang taneh prong tal 13 sào, buh jien tame ngak sa bein pabam pajaih prong labaih 1.000m2. Saai brei thau: “Piah pala phun ni ngan song taneh prong ye kan di abih nan lac pajaih phun  sọ chó. Oh hu labik halei hu janih pajaih ni langiu meng langik tasik, nan ye, hulin pah biak rilo menuac daok di grauk labik, tagok tal dom bhum ceik Ba Tơ, tỉnh Quảng Ngãi, piah duah janih phun ni”. Hadei di rilo bilan duah, yaok pluh ribau phun hu saai ba mai pala veik angaok taneh mbon ceik, yaok sào pala 1.000 phun, saai pataom hu labaih  13.000 phun sọ chó.

Piah ka phun tamuh siam, saai Quyền blei jamriak pruh ia patak pataom, sang pabam pajaih meng halam pacang halui khang kajap. Saai lac: “Phun  sọ chó lac janih phun tamuh dalam glai, ala dom dhar phun halui, labik takik pandiak. Dalam tuk pala phun, hulin hu pala pabak dom janih phun tamuh eng dalam glai di ala labik pala phun sọ chó song pala gam phun plang, piah paik mek song pandar siam taneh pala ”.

Urak ni bein pala di saai hu labaih 1.000 phun, dom phun pabam pajaih hu pala dalam phein song me-om pong piah pacang pandiak. Dom phun ni gam lac phun pajaih, gam piah patagok jeng phun  cảnh dalam sang.

Saai Quyền brei thau “Phun sọ chó biak mbuan pabam pajaih, meng jalan pagam dhar, hadei di sa tuk vak nyu jeng phun bahrau. Sa phun sọ chó praong nyu glong labaih 1m, tamuh jeng mbu praong”. Ndom ka kan kandah di bruk pala phun sọ chó, saai  Quyền brei thau, phun bhian njauk ruak halak mbang phun, sanam hala. Kayua yau nan ye dalam tuk iek glang brei tui iek catang bruk tamuh tagok di phun. Min phun tamuh eng dalam glai nan ye pren duik di nyu biak siam, tok pruh ia saong oh pandar  jru hagait. Phun sọ chó lac janih phun pala hacih saat.

Meng tuk pabam pajaih tal tuk paik mek dui atah  6 bilan. Tui kuhria paik 5 phun ye hu  1 kg hala sọ chó. Phun sọ chó diuk hu meng  2-3 thun, nan ye tok pala sa mbang song buh prein iek glang. Hadei di nan, salih meng phun bahrau piah ka hala phun sọ chó hu siam tuk paik mek.

Urak ni, yaom pablei hala thu phun  sọ chó labaih  800.000 đồng/kg, hala that 350.000 đồng/kg, kein laba jang dut song  rilo janih phun pala karei karei./.

Urang lang: Hanipha