Sa-ai Sằn A Lộc daok di palei Nha Húi, xã Mỹ Sơn, huyện Ninh Sơn, tỉnh Ninh Thuận lac po trang trại pala thanh long rilo bhong tui jalan hữu cơ hu taneh pala praong abih urak ini di huyện Ninh Sơn. Kein laba meng phun thanh long rilo bhong ba jien tame ka sang sa-ai labaih 2 tỷ đồng yaok thun.

Mblang hamu thanh long di sa-ai Lộc praong labaih 3 ha. Sa-ai ngak jalan pruh ia piah khik ka phun hijao siam di bhum mbon ceik Nha Húi daok tame bilan pandiak thu. Dom got thanh long pala tapak gauk, daok tabiak baoh bhong meriah..

Tapa duah thau, sa-ai mboh urang nong tỉnh Bình Thuận pala phun thanh long takik pandar ia pruh, lagaih haong lingik pandiak thu. Sa-ai kuhria salih phun pala, sa-ai Sằn A Lộc mboh lac phun thanh long rilo bhong pala tui jalan hữu cơ sinh học meng cakrok hu khang kajap angaok bhum taneh mbang tui ia lingik.

Akaok thun 2011, sa-ai Lộc tame tỉnh Tiền Giang, nao tal Viện roh duah phun mbang baoh gah meraong duah thau ka phun thanh long. Sa-ai ba tui haluk di Nha Húi caong dom urang ilamu pasang iek piah thau lac pala phun thanh long rilo bhong hu halei oh. Sa-ai biak uan tabuan tuk taduan hu panuac javap jalei di Viện lac taneh riya saong lingik tasik di Nha Húi biak lagaih ka phun thanh long tamuh praong siam.

Hadei di 3 mbang tame Tiền Giang bac bruk pala thanh long, sa-ai mai sang pataom phun jien hu labaih 1 tỉ đồng buh tame pala 3 ha thanh long rilo bhong. Akaok bilan 7/2011, sa-ai Sằn A Lộc pah radaih pajeng 12.000 hom pajaih thanh long rilo bhong kayua Viện roh duah phun mbang baoh gah meraong pabam pajaih ba mai pala di Nha Núi. Sa-ai ngak jalan pruh ia sit sit piah patak pataom ia.

Jaik 7 thun tamuh siam di taneh Nha Húi, bein thanh long di sa-ai Sằn A Lộc paik baoh hu  7 mbang sa thun yaok thun. Dalam nan hu 4 mbang njauk bilan tabiak bingu eng saong 3 mbang suan bilan truac hagom di tuk Tết Nguyên đán. Phun thanh long rilo bhong glang iek siam hadei di 24 bilan paik baoh hu, meng tuk tabiak bingu tal tuk baoh tasak lac meng 50- 55 harei. Thanh long rilo bhong pala tui jalan sinh học hữu cơ, baoh tasak teik trak 400- 500 gram, pahe, bingi. Sang sa-ai Lộc daok paik baoh thanh long, hu urang pablei salih meng Phan Thiết ba ô tô tabiak blei pak di bein yaom 25.000 đồng sa kg, gloang jang 2 mbang duk saong yaom thun bloh. Yaok got thanh long paik hu 10 kg yaok mbang.  Meng 3.000 got thanh long, sang sa-ai mek hu 30 tấn yaok mbang. Tui yaom pablei 20.000 đồng sa kg, sa-ai pablei hu 600 triệu đồng, dalam nan jien laba lac 300 triệu đồng sa mbang.

Ong Nguyễn Canh, Phó trưởng Ban Quản lý thôn Nha Húi brei thau, sa-ai Sằn A Lộc lac urang nong thau sahneng duah jalan ngak bahrau, lagaih haong bruk biến đổi khí hậu di puk palei. Nha Húi lac bhum taneh thu lagu di abih dalam huyện Ninh Sơn, sa-ai Lộc brei kuac danao khik piah ia, ngak jalan pruh ia patak pataom ka thanh long rilo bhong ba mai kein laba gloang. Mikva dalam palei hu  6 sang bac megru bruk pala thanh long di sa-ai Lộc hu peih praong taneh tagok jaik 9ha. Sa-ai Sằn A Lộc lac urang hadah krah dalam bruk bhap bini khik caga An ninh Tổ quốc saong kuac danao pacang pandiak tani tanat bruk pala drak, hu UBND tỉnh alin brei ralo harak meyaom.

Kadha “Urang ngak hamu” adit ini tal ini likau padeih. Kadha ini kayua rayo sap ndom VN pambuak haong Pasak pachreih nong negar ngak./.