Meng dom mblang taneh klak saoh, tukvak jiak ini, rilo sang di xã Tân Quy Tây, Tân Phú Đông saong Phường An Hòa,  Ban Sa Đéc, tỉnh Đồng Tháp pambuk bimao pong daong ka rilo urang nong mek jien tame biak rilo. Pong hadei tuk pala bimao blaoh pablei veik ka urang pala bingu.

Piah pambuk bimao pong, mikva nao blei pong guon blaoh  yaom 22 ribau đồng/ sa guon, kuhria rah tapa yaok sa công taneh jien blei pong saong meo labaih 20 trieu đồng, hadei di 20 harei pambuk pong saong pruh ia lac paik hu baoh bimao pablei.

Yaok công taneh pala bimao pong meyah bimao tamuh siam, yaok harei paik hu labaih 100 kilo bimao. Kayua tuvak ini daok tame bilan thu yau nan ye yaom bimao biak glaong, urang mai tal bein blei  yaom labaih 50 ribau đồng sa kilo. Yaok mbang pambuk bimao, urang pala paik hu bimao gam gam dalam 15 tal 20 harei.

Hadei di tuk paik bimao blaoh, pong ini hu pablei veik ka dom bein pala bingu di palei bingu Sa Đéc yaom yaok công pong jaik 8 triệu đồng. Hadei meng kaoh blaoh phun jien buh tame ngak, yaok công bimao pong urang pala laba hu labaih 40 triệu đồng tok dalam 2 bilan. Lingiu di nan, urang ngak nong meda mek pong labaih piah ngak khak hữu cơ pala dom janih njam patam baoh kraoh katut harei jeng daong patagok jien mek tame.

Hu thau, dahlau daih dom mbang taneh bilau hu bhap bini mek pala bimao jeng lac taneh hamu atau taneh dhaong. Hadei di tuk peih dom jalan, rilo mblang taneh di labik ini oh daok lagaih piah ngak padai nan ye rilo sang salih tapa pala bimao pong, pala bingu.

Tapa nan oh caik ka taneh klaak saoh, gam hu jien mek tame saong daok hu khak pong pablei ka mikva urang nong palei bingu  Sa Đéc, piah hu bruk kurang khak pong yau dom thun dahlau./.

Urang lang: M.Phuong - 5/5/2021