Dom thun dahlau diah, bruk raong hadang ilamu glaong hu tamuh tabiak di Bến Tre. Meng thun 2016, bruk ini hu cak rok patagok di 3 huyện tapen tasik di tỉnh nan lac: Ba Tri, Bình Đại, Thạnh Phú ngan haong mblang taneh akaok mereip labaih 250ha. Jak jeng gah kinh tế di bruk raong hadang pandar ilamu glaong ba mai hu patagok mblang taneh palao raong jeng 1.680ha di thun 2020. Tui taong yaom ye năng suất kuhria rah tapa hu 60-70 tấn/ha mbaok aia, urang raong duah hu meng 700-800 triệu đồng/vụ. Meng bruk raong hadang pandar ilamu glaong di urang nong Đặng Văn Bảy (huyện Thạnh Phú), hu bruk daong saong panduan jao ilamu meng  Công ty cổ phần CP Việt Nam brei mboh, hadang raong 15 drei tame sa kg, kein laba rilo jang jaik 50 triệu đồng/danao raong. meng bruk khang hatai salih jalan ngak, ong Bảy urak ini hu jeng urang nong ngak mbang pablei salih naih jioy pakat negar ngan haong jien mek tame meng bruk raong hadang jaik 30 tỷ đồng/thun. 

Hadei di rilo thun raong hadang tui jalan ngak meng kan oh mek hu kein laba gaong yau hatai caong khin, ong Phan Văn Quẹo (daok di xã Thạnh Phước, huyện Bình Đại) hu salih jaik 3ha piah pandar ilamu ini saong hu pambuak bruk daong ilamu haong pabak anek pajaih meng sa jabat karei. Tui nan, tapa 2 vụ raong, năng suất hadang tagok 4-5 mbang angaok sa mblang mbaok aia; jit ruak, hadang metai biak takik. Cuang kandah di jalan ngak ini lac phun jien buh tame tuk akaok mereip biak glaong. Raong tui jalan ilamu glaong ye njauk buh jien tabiak ngak dom danao raong yau: danao padang khik aia; danao pabam anek pajaih, danao raong. 

Ong Võ Trịnh Quốc Toàn, Akaok jabat ngak nong saong patagok palei pala huyện Bình Đại, ndom lac: “danao raong meblah 20-30% taong abih mblang taneh. Anek pajaih hu pabam dalam 15 tal 20 harei, hadei di nan meng brei tapa danao raong, mật độ raong meng 100-300 drei/m2 danao raong, piah pasang iek siam jit ruak, patrun khat lahik, pasang iek siam môi trường aia, bruk raong hu jang dut haong jalan raong meng kan”. Tui ong Toàn, urak ini mblang taneh raong hadang ilamu glaong dalam huyện jaik 800 ha. Vaktu 2020-2025, huyện hu jalan cak rok patagok jaik 2.000 ha raong hadang taskik ilamu glaong, meblah 50% mblang taneh raong di tỉnh. 

Ong Nguyễn Minh Cảnh, Phaok akaok UB bhap bani tỉnh Bến Tre brei thau, tukvak anak tal, Bến Tre peih ngak samu gauk dom jalan ngak meng cơ chế, sarak tal bruk padang ngak hạ tầng, cak rok patagok ilamu. Abih di nyu lac jhul khang bruk jak ba buh jien tame ngak gah raong hadang pandar ilamu glaong saong padang ngak sang mac ngak tabiak hadang… Gam haong nan, tỉnh meda cak rok patagok dom bruk pambuak gauk di dom baoh sang raong, dom labik raong sit sot jeng tổ pambuak bruk, hợp tác xã piah ngak jeng dom labik raong hadang pataom, praong ngak jeng labik pambuak bruk haong doanh nghiệp pabak brei pandap panda anek pajaih piah raong saong blei veik hadang tui chuỗi giá trị, patrun dom bruk trung gian, dang kreh./.

Urang lang: Jasi -09/06/2021