Bruk raong ada tasik hu peih ngak iek di 2 xã Phú Đông saong Phú Tân, huyện Tân Phú Đông, tỉnh Tiền Giang. Tuk tame bruk ini, urang raong ada hu daong brei abih pajaih, daong 25% jien blei pandap mbang ka ada meng tha harei tal 20 adit saong daong 25% jru pametai anek ruak.

Pajaih ada tasik 15 (iew katut lac ada tasik) nan pandap lac janih ada kayua Pasak Roh duah ada Đại Xuyên di Viện Raong glang - Mentri ngak nong saong patagok palei pala roh duah saong hlai tabiak. Urak ini, pajaih ada tasik 15 raong  hu kein laba di dom tỉnh hu tasik kayua ada ini mbuan randap saong ia taba atau ia tasik yau nan ye lagaih haong bruk biến đổi khí hậu; drak praong, mebaoh ralo; ralow mbang bingi, baoh pahe. 

Muk Đỗ Thị Kim Hiếu daok di palei Rãnh, xã Phú Đông nan lac sa dalam dom baoh sang hu tame bruk raong ada ini brei thau, janih ada tasik nan diuk hu dalam ia tasik, takik metai saong drak praong. Kayua menyum ia mbak saong diuk hu di dom labik ia mbak ralo, janih ada ini diuk hu dalam kan kandah di bhum tasik  lac kurang ia taba di bilan thu yaok thun. Bruk raong ada ini oh abih phun jien rilo, meda raong meng pandap mbang di langiu hu rilo dinh dưỡng, saong ada ini nyu nao duah pandap mbang biak joi.  

Tui Tiến sĩ Thái Quốc Hiếu -Chi cục Thú y tỉnh Tiền Giang, ada tasik ini lac janih raong hu yaom glaong, samar praong, pacang hu jit ruak siam, diuk hu di ia mbak saong ia taba di tỉnh nan ye raong hu di dom labik pabah  kraong, pabah tasik saong tapen tasik. Bruk raong ada nan daok peih tabiak jalan ngak birau ka urang nong dalam bruk parilo janih raong, lagiah saong bruk biến đổi khí hậu kan kandah yau urak ini./.

Urang lang: Aí Nghiêm - 1/7/2020