Kayua jalan pandar samu gauk ilamu pala pa-aok brei rilo baoh di urang nong Phù Cát

Tuk camereip, pa-aok pala pak ini hu takik baoh kayua dom sang bein oh ka thau ilamu pala. Tukvak pa-aok daok sit oh ka brei baoh, phun pa-aok njauk pruh aia ginup pasah, abih di nyu lac dalam bilan pandiak thu piah ka phun cak rok patagok samar, khang, drah brei baoh. Tal tuk pa-aok prong, brei paik baoh, njauk pruh aia ka nyu ginup hadei di tuk paik baoh piah ka phun nyu tabiak rilo caduk meda.

Abih di nyu lac, dalam tukvak pachreih phun tabiak bingu, pa-aok brei hu pruh ia gam gam piah tabiak bingu siam. Hadei di tuk pa-aok ndam baoh, njauk pruh takik aia veik piah daong ka phun cakrok patagok samar. Langiu di nan, bruk buh khak, iek glang dhal phun saong mbao baoh jeng njauk peih ngak ka nyu njauk jalan ilamu ky thuat piah pa-aok brei rilo baoh praong, siam.

Tui po bein Nguyễn Văn Dũng, hadei di yaok mbang paik baoh, bein pa-aok njauk cakak dhar piah ka nyu cak rok patagok. Phun halei dhar kapal njauk cakak klaak meneing, dom dhar glaong jeng yau nan, cakak meneng piah ka phun nyu tabiak dhar bahrau, bilan hadei pa-aok meda tabiak bingu rilo jang. Cakak dhar nan lac jalan ngak piah ka phun pa-aok nyu “meda jang”, phun brei baoh praong, mekre.

Pa-aok cuah Hòa Lộc hu siam lagaih di labik lac nyu tabiak bingu rilo mbang, yau nan ye meyah khut mbang bingu ini ye daok mbang bingu karei nyu pabak tame nan ye po oh huac lahik abih mbong. Buh khak ka pa-aok jeng njauk buh gap mbiah, pandar takik khak hóa học, 1 gha tok buh meng  1-1,5kg khak NPK 20-20-15 sa thun, rilo meng lac buh khak van ro, khak hữu cơ. Jru khik caga phun pala jeng tok pandar tuk pa-aok tabiak bingu piah pacang caga ruak thán thư saong bọ trĩ.

Daok tui ilamu di po bein Nguyễn Ngọc, meyah phun pa-aok buh rilo khak hóa học ye meda brei baoh hu sambo màu hijao bleit oh mekre meta urang blei, bo baoh prong, hu sambo màu kanjik katam nan ka pablei meng nduac.

Ong Ngọc brei thau: “Hadei di tuk pa-aok brei baoh jaik 50 harei njauk mbao baoh piah pacang cakak anek roi saong halak halin palai kaik. Langiu di nan, baoh pa-aok hu mbao, aia harei oh pasang tapak tame baoh ngak ka pa-aok lahik sambo màu. 1 mbao me-aom baoh dahlak blei 650đ, me-aom hu 3 vụ, oh lahik hadom jien min hu rilo kein laba. Pa-aok hu mbao baoh tuk paik baoh ye baoh janih sa meda hu 70-80%, meyah oh mbao ye pa-aok janih sa tok daok 30-40%, po bein njauk khat lahik kayua yaom di baoh pa-aok janih sa saong janih dua nyu atah di gauk biak prong”.

Tui dom po bein pala pa-aok, pa-aok 5-6 thun hu brei rilo baoh, tal tuk 10 thun ye pa-aok tabiak baoh biak rilo. Meyah mong iek siam, yaok phun pa-aok meda brei 150 baoh./.

Urang lang: Jasi - 26/05