Raong arieng tasik

Ong Nguyễn Văn Huệ daok di palei Rạch Gốc, xã Long Hòa, huyện Châu Thành, tỉnhTrà Vinh khan lac, arieng tasik mbuan raong, abih di nyu lac kan metai tuk ia salih karei, takik ruak, jien kuac danao raong saong pandap mbang takik jang meng 3 tal 4 mbang duk saong raong hadang sú. Tukvak raong palimek arieng meng 15 tal 20 harei ye mek pablei. Arieng ralow raong meng 5 tal 6 bilan ye 3 tal 4 drei tame sa kg. Yaom kaom saong darak pasar pablei biak tani tanat. Thun 2019, jaik abih dom urang raong arieng jeng hu laba glaong kayua yaom arieng pablei biak tani tanat. Yaom arieng pablei harung meng 150 tal 160 ribau đồng sa kilo, arieng rilow janih ka 1 (3 drei tame sa kilo) yaom meng 270 tal 280 ribau đồng sa kilo, arieng gạch meng 300 tal 320 ribau đồng sa kilo. Raong arieng tasik dalam vaktu jaik 4 bilan kuhria meng tuk palao pajaih tal tuk mek pablei, yau nan ye meda raong hu klau mbang dalam thun. Tui yaom arieng tasik tani tanat yau urak ini ye bruk raong arieng brei jien mek tame tani tanat jang raong hadang sú, hadang thẻ takai mbong. 

Tui UB bhap bini xã Long Hòa, tukvak jiak di ini, urang ngak nong di palei ini salih bruk raong hadang takai mbong klau vụ dalam thun tapa raong arieng meng dua tal klau vụ arieng tasik atau sa vụ hadang takai mbong saong dua vụ arieng tasik. Bruk ngak nan hu daong ka urang nong dauh hu jien tame kajap jang. Tapa 5 thun salih bruk raong kaya dalam ia, rilo urang raong kuhria hu tukvak mek arieng pablei di dom harei roya lễ, Tết, nan ye pablei hu yaom glaong.

Gah ngak nong tỉnh pachreih urang nong bhum tapen tasik patagok bruk raong arieng, abih di nyu lac arieng tasik raong dalam danao hadang sú, hadang thẻ takai mbong piah salih ka sa vụ raong hadang piah takik gaok khat lahik tuk raong hadang klau mbang dalam thun. Urak ini, yaok thun urang nong di Trà Vinh raong arieng tasik di taneh danao praong 13.000 hecta; dalam nan hu labaih 35% taneh raong thâm canh,  mek hu meng 0,8 tal 1,2tấn sa ha. Taong abih arieng tasik mek pablei di tỉnh hu labaih 1.400 tấn sa thun./.

Urang lang: Aí Nghiêm -11/03