Sa-ai Khương daok mek baoh bao darang

Dalam tukvak pala njam nhút saong njam blứt di palei, sa-ai Khương mboh bao darang juk diuk hu dalam danao pala njam blứt. Nan ye sa-ai saneng tal bruk raong bao darang juk. Sa-ai Khương brei  thau: “Thun 2016, dahlak blei 300kg bao darang juk mai palao raong iek dalam danao njam blứt. Min, kayua oh ka hu ilamu mong iek nan ye bao metai biak rilo, dahlak khat abih jaik 10 triệu đồng”. Oh kadun likuk, hadei di tuk roh duah, bac megru ilamu meng dom bruk raong bao angaok Internet, sa-ai nao blei veik 20.000 baoh bao pajaih meng tỉnh Thanh Hóa abih 20 triệu đồng mai raong. Tapa 4 bilan, baoh bao praong siam saong sa-ai Khương hu jien mek tame.

Sa-ai Khương khan lac: “baoh bao darang juk mebaoh biak samar, labaih 4 bilan raong ye dahlak pablei hu yaok bilan meng 50-100kg bao ralow. Hadei di labaih 1 thun raong, bao mebaoh biak rilo saong pablei hu yaok harei meng 50-100kg. Tui tukvak, bao hu dom urang pablei salih mai blei yaok ký yaom meng 25.000-70.000 đồng. Kaoh abih phun jien buh tame, yaok bilan dahlak daok laba hu meng 20-30 triệu đồng”. Kayua baoh bao ralow di danao raong oh pabak ginup ka darak pasar, dom thun jaik di ini sa-ai Khương daok nao duah blei bao di bhap bani dom tỉnh, bal jaik taphia mai pablei veik piah duah laba. Kuhria rah tapa, sa-ai Khương hu blei meng 1- tal 1 tấn meteh bao. Hadei di tuk pablei veik, sa-ai Khương laba hu meng 2.000-3.000 đồng/kg.

Meng thun 2019 tal ini, sa-ai Khương hu pasiam veik mblang taneh danao raong piah peih prong bruk raong bao mebaoh pambuak pagam haong bao ralow. Urak ini, sa-ai Khương buh jien tabiak ngak hu 19 baoh vèo raong bao pajaih. Bao amaik ame hu raong palao langiu dom baoh danao hadei di nan pataom mek baoh di nyu mai karam raong dalam vèo. Sa-ai Khương khan lac: “urak ini, dahlak raong hu jaik 300.000 baoh bao amaik ame. Dalam tukvak karam raong, bao anek hu jalan raong biak karei. Hadei di sa bilan raong, bao anek prong samu akaok gai duh ye ba pablei yaom meng 350-400 đồng/drei”. Kuhria rah tapa, yaok bilan, sa-ai Khương pablei hu meng 100.000-200.000 drei bao anek. Hadei di tuk kaoh abih phun jien buh tame, sa-ai Khương daok laba hu meng 20-30 triệu đồng. Ndom ka jalan ngak di anak tal, sa-ai Khương lac daok peih prong bruk raong bao ralow pambuak haong bao mebaoh, saong brei peih rilo labik blei baoh bao piah hu jien mek tame rilo jang.

Bruk raong bao ralow pambuak haong bao mebaoh di sa-ai Khương nan lac bruk ngak mbang ba mai kein laba glaong, njauk hu peih prong./.

Urang lang: Jasi-27/5