Lac sa dalam 12 baoh sang raong hadang cong nghiep di xã Hải Triều, huyen Hải Hậu, sa-ai Nguyễn Ngọc Minh, palei Tây Bình brei thau, thun 2017 tui jalan tacei ba di karja palei  brei salih hamu sara takik kein laba tapa raong pala kaya dalam ia piah pandar hu dom kein lagiah di bhum tasik saong patagok kinh tế,  sang sa-ai taduan hu 6.000 met vuong piah raong hadang thẻ takai mbong tui jalan raong công nghiệp công nghệ glaong.

 Sa-ai Minh brei thau, hadang lac janih raong biak mbuan ruak mbuan metai tuk langik tasik saong alam moi truong salih samr oh tani tanat, kayua yau nan ye piah patrun patakik jit ruak ka hadang, plaik njiak khat lahik njauk pasang iek ia dalam danao raong ka siam. Tui jalan raong ini, danao raong hadang brei ngak ndaong mbaok taneh, praong sit ka lagaih, bhian meng 900 tal 1.000 met vuong sa baoh danao. Danao raong bhian oh caoh dalam tame haluk bo brei ngak daning meng betong ximang vin taom dar, ar danao saong ala danao brei tuak sir meng blah nilon.

 Di kreh yaok danao hu phluh sa gilaong piah tathuak nerak dalam danao tabiak jalan halang ngak hacih. Tui jalan ngak ini, ia dalam danao raong tuk halei jeng hacih, hadang takik ruak jang. Ia raong hu mek tapak meng tasik tame tapa pandap halang hacih nan ye plaih hu bruk njom khuẩn di dom danao saong gauk.

Meng bruk ngak danao raong tui jalan birau, sang sa-ai Minh jeng yau 11 baoh sang karei di labik raong hadang cong nghiep meda raong hu meng 200 tal 250 drei sa met khoi ia, glaong jang rilo mbang dut saong raong tui jalan quảng canh (lac raong meng 50 tal 70 drei sa met khoi ia). Meng hu glang iek siam, hadang khang kadang, meng 3 tal 4 bilan ye 45 -50 drei dhang trak hu sa kilo. Meyah raong njauk, kuhria rah tapa sa danao raong sa thun mek hu labaih 5 tấn hadang. Tui yaom pablei 170.000 đồng sa kilo, jien mek tame hu labaih 850 trieu dong sa danao.

Xã Hải Triều, huyện Hải Hậu hu 100 hecta danao raong kaya kan dalam ia ngan saong 250 baoh sang raong. Dahlau diah, mikva rilo meng raong hadang, ikan, arieng tui jalan klak meng kan, takik buh jien ngak pasiam danao, jalan ba ia saong halang ia hacih nan ye kein laba kinh tế gah raong pala kaya kan dalam ia  pagam pambak tame langik tasik, jit ruak. Dom thun jaik di ini, thau hu yaom glaong di bruk pandar ilamu cong nghe tame raong pala, hu 40 baoh sang buh jien tame  ngak pasiam danao raong hadang tui jalan cong nghiep. Dom bruk ngak ini ba mai kein laba glaong, jeng bruk ngak mbang praong di dom xã bhum tapen tasik./.