Salih ka bruk raong ikan dalam danao, vin taom dar sang, ong Nguyễn Văn Biên, urang taha ngak nong lavik thun, (hu mikva daok pak nan iew lac Ba Biên) hu labiah 20 kuang ia, dalam nan hu kuang tauk bạt saong kuang ximang piah raong ikan tai tượng.

Ong Ba Biên khan lac, thun 2010, mboh bruk raong ikan tai tượng dalam danao, ribaong, ia mbuan njom nerak tachrauk saong kan khik iek hu tapon ikan ba tal khat lahik rilo, nan ye ong duah thau blaoh salih tapa raong dalam kuang tauk bạt.

Raong ikan dalam kuang tauk bạt saong kuang ximang hu rilo siam lagaih, takik khat lahik. Kayua kuang sit, urang raong caga hu ia, meda salih ia karei tuk ia njaom nerak, nan ye ikan diuk praong siam, takik ruak. Meng bruk parabha jeng rilo kuang sit, yaok kuang ia praong meng 40m²  tal 100m², daong ka urang raong mbuan tui iek tuk ikan praong, mbuan pasang iek prein yawa di ikan.

Bruk padang ngak tuk camereip ka bruk raong ini biak mbuan, ngak kuang bạt atau ximang phun jien oh praong. Dalam tuk raong tok abih jien blei pandap ka ikan mbang saong menyek njuk pruh ia piah salih ia. Piah takik abih jien blei pajaih, ong Ba Biên blei ikan pajaih anek mai raong dalam kuang karei piah tuk ikan praong meng 2 tal 3 anek tangin ye srong tapa kuang karei raong. Yaok 3 tal 4 bilan  ong palih ruah iakn praong sumu gauk ba tapa dom kuang karei raong, meng nan hu jalan brei mbang, iek glang ka nyu lagaih.

Piah ikan praong siam, ikan palao dalam kuang meng 600 -700 drei yaok 40 m² lac siam. Labaih 2 adit brei salih ia di dom kuang raong. Meng hu yau nan, ikan diuk praong siam. Ong Ba brei thau, ikan tai tượng lac janih ikan mbuan mbang, langiu pandap mbang asar di ikan ye ong pala njam, phun patei vin val sang, blei veik njam urang klaak piah ngak pandap mbang ka ikan.

Ikan tai tượng hu labik pablei tani tanat, langiu urang blei piah pablei veik, ye dom kuan mbang, nhà hàng jeng bhian blei. Tui yaom pablei 60.000 đồng sa kg, yaok tấn ikan ong Ba Biên hu laba labaih 20 trieu đồng. Kuhria rah tapa yaok thun, sang ong pablei meng 3-5 tấn, laba hu jaik 100 trieu đồng.

Dalam tuk rilo bhum palei daok rah tabiak bruk đô thị hóa samar drah, rilo taneh ngak nong daok takik ye bruk pandar dom taneh sit, dom labik taneh klaak saoh, atau mblang bein piah raong ikan, duah jien tame ka baoh sang lac bruk bo rilo sang meda ngak hu, mbuan ngak, njauk pambak praong piah daong salih ribau raidiuk bhap bini.

Ong Lưu Đức Phương, Akok kapol Urang nong phường An Thới, quận Bình Thủy, Ban Cần Thơ brei thau, bruk ngak nong ini biak siam lagaih dalam tuk taneh ngak nong dak harei dak takik. Kapol Urang nong phường  tuk halei jeng pachreih ba, daong ka ong Ba Biên patagok bruk ngak nan saong yaih khan piah ka dom urang hội mai ri-vang saong bac megru ngak tui./.

Urang lang: Ai Nghiem - 8/12/2021