Van ro raong tapai di sa-ai Nguyễn Văn Hải peih tabiak ngak meng bilan  12/2019. Mblang taneh raong di sa-ai prong 300 m2, hu padang ngak biak khang kajap haong khung pasei, tabung tôn pacang pandiak, pambang tho hu kreih camin hadah.

Sa-ai padang ngak van ro hu 6 talei pacang piah raong kreik karei tapai amaik, tapai ralaow, tapai pajaih ka nyu laghaih haong bruk raong glang. Van ro hu gom LED truac hadah, abih meng 1500 - 2000 kW điện sa bilan, 3 mac kadhik ngak la-ar, hu camera pasang iek.  

Ia hu mek meng bingun kuac di sang piah puh ramik van ro, aia halang hacih piah ka tapai menyum yaok harei. Piah plaih di nerak tachauk môi trường, pacang caga jit ruak, sa-ai pandar sa lubang khí bioga piah xử lý aia nerak, yaok harei hareik hareim khang, aih tapai hu pataom mek piah buh ka phun pala di sang.

Tapai balau mbong bo sa-ai daok raong nan lac pajaih lai New Zealand blei di labik pablei pajaih hu angan je. Pandap mbang ka tapai lac haleik hu ngak jeng asar, hu blei di dom đại lý hu angan je. Sa-ai Hải khan lac: Tukvak brei ka tapai mbang yaok harei 2 mbang di tuk page saong biar harei, min brei mbang ka nyu njauk tukvak. Langiu di nan daok brei ka tapai mbang pabak dom janih njam hacih pala di bein yaok harei sa mbang di tuk biar harei. Tapai amaik metian meng 28 - 32 harei saong brei hu mong iek biak tani tanat.

Yaok thun, sa drei tapai amaik menek 6 mbang, yaok mbang meng 6 - 8 drei, min njauk palih ruah 6 drei khang kadang di abih piah raong pablei ralaow. Tapai pajaih piah raong veik atau pablei ka urang caong khin. Piah pacang caga jit ruak, sa-ai Hải brei klauk jru pacang caga 4 bilan 1 mbang vacxin, 1 bilan brei menyum jru 2 harei piah pacang caga tapai ruak laka saong bimao langiu kalik...

Meng tuk raong tal tuk pablei lac meng 4 bilan meteh tal 5 bilan, yaok drei tapai teik trak meng 2,3 – 2,5 kg, tapai amaik ame trak jang meng 3,5 – 4,0 kg/drei; yaom pablei meng 100 ribau đồng/kg.

Sa-ai Hải daok brei thau lac: Phun jien buh tame akaok mereip jeng biak prong, jaik 1 tỉ 200 triệu đồng ngak van ro, pandap panda raong, pandap mbang, jru pacang caga ruak, jien blei tapai pajaih 60 triệu đồng… Min meng raong njauk ilamu kỹ thuật, kaoh abih phun jien buh tame jeng daok laba hu jaik 400 triệu đồng/thun. Sa-ai Hải daok brei thau, anak tal brei ngak gac sa lubang khí bioga piah xử lý nerak tachauk, pandar phun jien patak pataom hu gam haong mesre phun jien di gilang pariak peih prong mblang taneh raong tapai jang 200 m2 piah cak rok patagok kinh tế sang./.

Urang lang: Jasi  28/4/2021