Brei lamo mbang pandap hacih saat 

Sang ong Sơn Hang raong limo ia tasau meng thun 2009. Kayua raong yau meng kan mai, oh thau ilamu raong, nan ye tapon limo bhian njauk ruak, lavang lavaih, hu takik ia tasau saong ia tasau oh siam. Kayua yau nan ye, yaom lac kham merat rilo thun min bruk raong limo ia tasau di sang ong takik hu kein laba.

Thun 2015, mboh danak dak raong limo ia tasau di tỉnh hu peih tabiak, sang hu mbaok tame hu daong rilo sarak nan ye ong likau tame danak dak. Meng nan, ong Hang hu bac megru ilamu raong glang, hu daong brei limo pajaih, hu urang jakar ilamu di danak dak bhian trun tacei pato tuk ong gaok kan kandah dalam raong glang, daong ka ong khang hatai buh jien tame cak rok patagok tapon limo. Ong Hang khan lac: dahlak mboh raong limo aia tasau hu laba rilo jang ngak padai atau pala njam. Min raong glang jeng hu bruk kan kandah di nyu, nan lac bhian njauk ruak laka cambuai tapaok kakau. Blaoh drei raong lavik thun, limo tapa rilo F1, F2, raong oh daok siam tra, khaol drei njauk palih ruah veik pajaih meng raong hu jeng.

  Tuk tapon limo rilo tagok, pandap mbang saong bruk khik caga alam môi trường nan lac bruk prong. Piah langyah bruk ini, ong Hang mek taneh pala drak takik kein laba  tapa pala hareik. Meng hu danak dak daong pajaih hareik, tangeiy, kadung pandih piah pandih mesam, khik piah pandap mbang biak siam, daong ka limo hu aia tasau biak siam. Blaoh ong mesre jien padang ngak var ro ka nyu laneng lanoi, ngak lubang biogas, daong ka tapon limo plaih hu dom ruak bhian gaok dalam raong glang. Ong Hang brei thau dom ilamu: Ngan haong limo aia tasau, meyah drei hu phun jien, blaoh drei pambak prong tapon, palih ruah pajaih siam, padang ngak var ro ka nyu njauk ilamu, laneng lanoi piah plaih jit ruak. Blaoh brei ka limo mbang trei, hareik siam, ye aia tasau meng hu njauk tui hatai caong di gah blei.

Meyah tuk bahrau hu mbaok tame danak dak raong limo aia tasau di tỉnh ngan haong 3 drei limo ye tal urak ini ong Hang hu 18 drei limo aia tasau. Dalam nan, 6 drei daok brei aia tasau jaik 100kg yaok harei, kaoh abih jien buh tame, yaok adit, ong laba hu  labaih 6 triệu đồng. Daok veik lac 12 drei limo daok prong saong drei la-oi binai.

Piah hu laba rilo jang, ong Hang daok brei blei dom janih jamriak, pandap panda duh ka bruk raong glang, yau mac tacaoh hareik, mac iak ia sau, kadhik ngak lahei van limo. Langiu di nan, ong brei pilih tabiak dom drei limo hu takik ia tasau, pataom tame iek glang dom drei hu pren yava khang kadang, piah mek hu rilo ia tasau yaok harei. Meng kein laba  dalam raong glang, urak ini raidiuk sang ong Hang hu tani tanat./.

Urang lang: Hanipha- 13/10