Limo mbang ginup, hareik siam, ye ia tasau pabak hu tanut chuẩn bo gah blei ba tabiak

Tui panuac khan di ong Sơn Hang, sang ong raong limo ia tasau meng thun 2009 haong meng 1 drei limo. Kayua raong tui jalan meng kan, oh thau ilamo raong bahrau, nan ye limo bhian njauk ruak, lavang lavaih, hu ia tasau takik saong ia tasau oh siam. Kayua yau nan ye, yaom lac kham marat rilo thun min bruk raong limo ia tasau di sang ong takik hu kein laba.

Thun 2015, mboh danak dak raong limo ia tasau di tỉnh peih tabiak, dalam nan, dom baoh sang hu mbaok tame hu daong rilo sarak nan ye ong likau tame danak dak. Ong Hang hu bac megru ilamo raong glang, hu daong drei pajaih, hu urang jakar ilamo di danak dak bhian trun tacei pato tuk ong gaok kan kandah dalam bruk raong glang. Meng nan, ong khang hatai buh jien tame ngak, cak rok patagok tapon limo. Ong Hang brei thau, tuk hu iek glang siam, njauk ilamo, tapon limo di sang ong praong samar saong ia tasau hu rilo jang, kein laba  kinh tế jeng siam jang dut saong bruk ngak hamu atau pata njam patam.

Tuk tapon limo hu rilo jang, pandap mbang saong bruk khik caga hacih sa-at lac bruk praong. Piah langyah bruk ini, ong  Hang mek taneh pala drak takik kein laba piah salih tapa pala hariek. Meng hu danak dak daong pajaih hariek, tangei, kadung pabam, ong peih bruk pandih pandap mbang, khik piah pandap mbang hu dinh dưỡng glaong, daong ka limo hu ia tasau biak siam. Blaoh ong masraiy phun jien padang ngak var raong lanieng lanoi, ngak lubang biogas, daong ka tapon limo plaih hu dom janih ruak bhian gaok dalam raong glang. “Ngan haong bruk raong limo ia tasau, mayah drei pambak praong tapon, pilih pajaih siam, padang var raong njauk ilamo, lanieng lanoi, oh hu jit ruak. Blaoh brei ka limo mbang ginup, hareik siam, ye ia tasau pabak hu tanut chuẩn bo gah blei ba tabiak, mayah drei raong min brei mbang pandap sarau kadhau ye ia tasau oh siam.”

Tuk bahrau tame danak dak raong limo ia tasau di tỉnh, ong bahrau hu 3 drei limo, min tal urak ni ong Hang hu 18 drei limo ia tasau. Dalam nan, 6 drei daok mek hu labaih 100kg ia tasau yaok harei, daok veik lac  12 drei limo daok caga saong limo binai sit. Urak ni yaom ia tasau pablei ka Vinamilk meng 14.000-14.500 đồng sa kg, hadei di tuk kaoh blaoh phun jien, yaok adit, ong laba hu labaih 6 triệu đồng.

Piah hu laba rilo jang, ong Hang buh jien tabiak blei jamriak mac moc duh ka bruk raong glang, yau ye mac thaok hariek, mac iak ia tasau, kadik ngak laar var raong limo. Ong jeng klaak tabiak dom drei limo hu ia tasau takik, pataom tame iek glang dom drei hu prein yava khang kadang, hu ia tasau siam piah khik tani tanat ia tasau di tanut glaong yaok harei./.

Urang lang: Thu Thao – 25/08