Di dalam bilan 6 ini, tuai damuai mai tal Da Lat tagok rilo. Angaok dom pasak yau ye jalan Trần Phú, atau vil taom dan labik danao ia Ho Xuân Hương… tal dom labik ngak nong tapen ban di Lạc Dương, Tà Nung, jeng hu rilo tuai damuai. Sa-ai Nguyễn Khắc Hoàng Lâm, rahra diuk rai lavik thun di phuong 4, brei thau: “Tame bilan pandiak he, ban drei bui sambai jang. Rahra di Da Lat khol dahlak hulin salam raok tuai damuai meng cambuai klao hatai chreih, payiak baoh kayau that bingi hacih sa-at saong dom asal kadha ka ban bhum angaok ceik mbuan glaong. Dahlak hulin jeng biak chreih hu taom gaok, ndom meyai haong tuai damuai atah jaik, brei yaih khan ka dom urang nan thau dom labik jirah daok takik urang thau saong dom labik jirah di bhum palei drei”.

Dalam bilan he ini Da Lat dak harei dak raok rilo baoh sang, rilo abih di nyu hu lac meng di Ha Noi, Ban raya Ho Chi Minh, Vung Tau saong dom tinh gah Pei negar. Sa-ai kamei Thùy Dương, sa urang tuai meng Ban raya Ho Chi Minh, brei thau: “Mbang mai jirah ini, khol dahlak ruah daok di labik padeih padei tapen danao Tuyền Lâm, labik hu thaik thaot gheih ghang, sron mboh saong siam mekre. Njauk ndom mayai di nyu nan hu lac, pandap mbang Da Lat tuk halei jeng ngak ka dahlak hulin mboh takre kayua nyu biak karei, pahe, bangi. Langiu di nan, asar siam jitvu hu sa tanut yaom jien lagaih ngak ka mbang nao jirah hu bui sambai saong njauk kanal hadar jang”.

Bruk dui pachreih di jirah rivang Da Lat daok hu paglaong meng hatai kham merat di dom gah ngak mbang pablei salih saong paglaong asar siam jirah rivang. Dom kongti jirah me-in jeng hu makna dalam bruk yaih khan thaik thaot di ban Da Lat. Ong Đinh Văn Dôn, Yam ndok Kongti TNHH Jirah Happy Day, brei thau: “Langiu di alam langik tasik, Da Lat daok hu rilo kein lagaih, labik hu ndap nda Organic atau dom labik ka jirah rivang duh yang mebang agama. Khol dahlak hulin daok peih ngak rilo paok pandap jirah rivang brei ka tuai damuai, nao tal jirah rivang ngak nong ilamo kong nghe glaong, kayua urak ini tuai damuai biak sangka tal ndap nda kaya ngak nong, dahlau di nyu dalam nan hu lac kaphe, padeih padei, massage pabak prein yava saong dom jitvu jirah rivang siam gheih karei”.

Piah bilan pandiak thun ini rah tabiak karo salamat saong siam lagaih, gah jirah Lam Dong hu srap grap tani tanat. Ong Nguyễn Tiến Hải, Phaok Yam ndok So Ilamo, Pahat padhih saong Jirah tinh brei thau, oh sa janih ieu lac peih ngak rilo dom paok pachreih jirah rivang, blaoh nyu daok ieu lac bhum palei daok peih padang rilo danak dak piah dui pachreih tuai damuai: “Khol dahlak hulin peih padang rilo danak dak gheih mekre yau ye yai kajal ndik ceik pakat dunya, dom danak dak brei kein lagaih… daong pachreih jirah rivang. Rilo labik jirah hu mbaoh tangin saong tagok veik dom danak dak jirah rivang iek”.

Tui kuhria, dalam dom harei akaok bilan he, dom labik padeih padei di Da Lat tagok rilo. Dom labik jirah rivang yau ye danao Tuyền Lâm, Thiền viện Trúc Lâm, Thung Lũng Uranam, Bein bingu ban saong dom labik maong iek taginum, jirah ngak nong di bhum tapen jeng hu rilo urang mai jirah. Bruk ramik jalan mbak di dom jalan pasak hu ngak siam, khik kajap bruk peih nduac radaih hu lagaih ka tui damuai dalam luac mbang padeih bac padeih bruk./.