Dom sang bac bruk ngak di TPHCM urak ini hu rilo salih bahrau

Hadei di tuk bac tamat danak dak THCS, Hứa Nguyễn Trọng Tín (ndih tapui thun 1995) nao bac bruk ngak Điện Công nghiệp saong Dân dụng di sang bac bruk ngak dalam 2 thun, gam haong bac ilamu di Pasak pato pakai thường xuyên (Quận Thủ Đức klak). Tal urak ini, Trọng Tín daok bac tagok danak dak ĐH di sang bac ĐH Sư phạm Kỹ thuật TPHCM gah gam bac gam ngak piah paglaong tangin ngak bruk. Tín khan lac, dom ilamu tuk hu bac di sang bac bruk ngak dahlau daih hu daong palagaih biak rilo tuk nao ngak saong tuk bac tagok glaong hadei ini:“Di sang bac meda lac hu jaik ginup ilamu piah ka drei tabiak nao ngak. Dom gru jeng daong palgaih, bac biak takre. Urak ini drei hu mbuan lagaih jang dom ayut sahabat bac ĐH chính quy, drei hu ilamu dalam bruk ngak kayua drei nao bac blaoh, dom môn bac blaoh ngak iek, drei thau hu glaong jang”

Ong Phạm Quang Tuấn, Phaok Hiệu trưởng sang bac Cao đẳng saong Công nghệ Thủ Đức brei thau, urak ini bruk tui bac bruk ngak hadei di tuk bac tamat THCS daok mboh tagok. Sa binah lac kayua bruk tacei jalan bruk ngak hu siam lagaih, sa binah lac kayua dom adei ba tabiak hu jalan piah patagok hadei ini iek tui prein bac di drei saong tui prein pabak jien padai di sang drei. Abih di nyu lac ngan saong dom anek saih bahrau bac tamat danak dak tal bac 9, lingiu di bruk hu miễn abih jien bac dalam 2 thun, sang bac jeng daong palagaih piah ka dom anek saih meda pilih ruah jalan ngak lac gam bac bruk ngak, gam meda nao bac di dom Pasak Pato pakai thường xuyên piah hadei ini pakacah mek bằng tốt nghiệp THPT meng bruk rami ramik tukvak, bac lý thuyết saong ngak iek di sang bac hu lagaih.

Lingiu di nan, bruk pambuak gauk di sang bac bruk ngak saong doanh nghiệp jeng hu jhul khang, daong palagaih ka SV hu pandar dom ilamu hu bac blaoh tame bruk ngak. Dom urang bac hadei di tuk bac blaoh dom danak dac jeng duah hu bruk ngak jaik abih, pabak hu caong khin di xã hội, meda ndom tal dom bruk ngak yau: pablei pandap di siêu thị, khik iek, rami ramik pandap tame tabiak kho bãi, pasiam radaih ô tô,… Ong Tuấn brei thau: “Dahlau di tuk tamat khóa bac, dom adei meda hu tukvak nao ngak iek di doanh nghiệp,ini lac ngak iek piah ka dom adei ngak hu dom bruk hu jao brei, ba dom ilamu bac blaoh di sang bac tame dom bruk ngak di doanh nghiệp. Doanh nghiệp hu quyền ieu ngak dom bruk njauk tui danak dak hu pato pakai di sang bac. Mbang ngak iek ini jeng hu pasang iek saong taong yaom di abih dua gah.”.

Sang bac Cao đẳng Lý Tự Trọng (quận Tân Bình, TPHCM) thun ini hu labaih 3.000 chỉ tiêu brei ka anek saih bac tamat blaoh danak dak tal bac 9. Urak ini, hu jaik 1.000 hồ sơ hu nộp tui jalan bac 4 thun hu bằng cao đẳng. Bruk njauk menyai di gah pato pakai ini, lac dalam 3 thun camereip urang bac gam bac trung cấp bruk ngak, gam bac ilamu pak di sang bac. Hadei di tuk bac blaoh 3 thun oh mek jien bac saong hu harak chứng nhận trung cấp bruk ngak, jdaok hu bac salah dom môn bac pakat THPT, urang bac hu bac veik 1 thun tra saong hu brei bằng tốt nghiệp chính quy hệ cao đẳng. Bruk bac tui jalan ini daok hu biak rilo amaik ame di anek saih caik hatai sangka. 

Tui ong Hồ Văn Sĩ, Akaok jabat pilih ruah anek saih – pato pakai di sang bac, siam lagaih di bruk bac megru tui jalan ini lac SV hu bac gam ilamu gam bac bruk ngak. Dalam nan 70% tukvak brei ka ngak iek bruk ngak, tukvak daok veik brei ka bruk pabak ilamu. Tuk bac salah blaoh danak dak, dom adei gam hu bằng bac tamat cao đẳng njauk adat, gam hu pabak ilamu bac da-a pak di sang bac. Piah patrun trak damak dalam bruk bac yau nan, dom môn ilamu jeng hu sang bac pilih ruah ka nyu lagaih, daong ka anek saih bac tamat hu siam danak dak: “Dom adei nao bac gah bruk ngak meyah pilih ruah danak dak phổ thông tui 13 môn atau 7 môn meda trak damak ka dom adei. Sang bac pilih ruah 4 môn tui jalan di Mintri Pato megru. Tui dahlak mboh, danak dak ini mbiah haong prein di dom adei, min jeng hu ginup ilamu piah daong ka dom adei dalam bruk ngak di drei. Dom adei jeng hu sang bac peih pakacah ilamu tui njauk adat ba tabiak.”

Meda mboh lac, dom sang bac bruk ngak di TPHCM urak ini hu rilo salih bahrau, meng jalan pato pakai, danak dak bac tal bruk padang labik pato bac piah dak harei dak pabak hu siam jang bruk bac da-a urak ini. Gam haong nan, bruk daong taong abih jien bac jeng lac jalan daong palagaih ka dom anek saih bac blaoh pakat THCS hu veik jalan pilih ruah saong jalan tui bac, paglaong tangin gheih ngak piah tuk bac tamat, dom adei hu bruk ngak saong hu jien mek tame tani tanat./. 

Urang lang: Mousa Phương – 29/05