Urang taong ikan angan Trần Văn Thu, daok di palei Phú Hải, ban sit  Phan Rí Cửa, huyen Tuy Phong brei thau, sang ong hu 2 baoh gilai taong ikan atah labaih 15m, bhian piah taong ikan atah di ar tame tasik dalam. Tuk halei jeng yau nan, yaok sa mbang tabiak tasik, ong jeng nao tal pabah lamnge piah brei thau saong dom po gilai jeng yau ye ong jeng hu urang jar pak ini pathau khan ka bruk taong ikan njauk hukum piah oh ngak suan:

“Gilai di kol hulin dahlak ngak njauk tui hu ginup, tuk halei tabiak tasik jeng pathau khan ka jabat pabah lamnge saong bien phong, tuk halei jeng hu vak gilac bruk dalam harei. Pasang iek bruk nao gilai hu hagait jeng pathau khan ka Jabat bien phong urang khik caga jalan talei tapen tasik haong nagar langiu saong jabat pabah lamnge thau cambaic laic. Tabiak tasik jeng khan, mai sang jeng khan, harei halei oh nao jeng khan brei thau ka jabat lamnge thau”.

Ong Bùi Văn Công, Akaok Kapul Hanh chinh tong hop – Mbang Ramik labik plaih rabuk jabat pabah lamnge Phan Rí brei thau, tukvak tapa hu pambuak haong bol lin pasang iek gah taong mek kaya ikan dalam tasik, bien phong piah pathau khan tal mikva taong ikan ngak njauk tui don hukum taong mek ikan hadang angaok tasik.

Huyen Tuy Phong ieu lac sa bhum palei di dalam 4 bhum palei (Phú Quý, Phan Thiết, La Gi) hu angan dalam bruk taong ikan biak khang hu labaih 1.850 baoh gilai ikan atah meng 6m tagok. Meng akaok thun mai tal ini, kapul jabat karja chuc nang hu pasang iek labaih 4 ribau mbang dom baoh gilai ikan tabiak pabah lamenge tame tasik; ikan hadang mek hu lac labaih 6.472 tấn.

Ong Lê Dương Hoàng Thuỷ, urang ngak di Balai Pasang iek ikan bhum Tuy Phong brei thau, kapul urang ngak bruk patui veik peih dom mbang pasang iek saong langyah brei ka dom boh gilai ikan ngak suan di dalam bruk taong mek IUU, rilo meng dalam nan ieu lac gilai ikan ngak bruk chrah papar jan giã cào par nduac suan jalan, gilai ikan pandar jamraik kích ndien piah taong mek ikan hadang; baoh gilai nao taong ikan matai harei brei dat, harak adat brei taong mek ikan hadang.

“Yaok harei dalam bruk pasang iek, khol dahlak hulin pasang iek ka kein lagaih piah brei ka gilai gaiy tabiak saong tame pabah lamenge. Khol dahlak hulin ngak khang catang saong oh brei tabiak tasik haong dom baoh gilai ginup “3 oh”, gilai ikan abih harei đăng kiểm saong abih harei harak adat. Dalam bruk pacang taong mek IUU, kol dahlak hulin pathau khan kakei brei mikva oh nao suan jalan tasik tui brei adat. Meng blaoh Balai Pasang iek ikan bhum Tuy Phong hu langyah 3 yau gu oh njauk, nyu ieu lac 6 bruk nao suan jalan tasik haong yaom jien taong phạt jaik 509 trieu dong”.

Karja pakat So Ngak nong saong patagok palei pala tỉnh, hu pasang iek, haling ruah, tabiak angan 173 baoh gilai ikan meda mbuan nao tapa bhum tasik negar langiu, pato tacei kapul chuc nang pasang iek catang. Tal ini hu salah blaoh 100% bruk pagam thiet bi pasang iek bruk angaok tasik di gilai ikan (VMS) ngan haong gilai ikan atah meng 15m ba tagok. Ong Huỳnh Quang Huy, Akaok Chi cục Ikan hadang brei thau, tal ini hu salah blaoh bruk tut angan, harak adat brei taong mek ikan hadang dalam tasik brei ka 2.336 gilai ikan “3 oh”.

“ Tuk peih ngak meng mboh sa asal kadha mbuan abih ieu lac hatai caong di mikva jeng caong hu ngak. Yaok Sa baoh gaiy gilai kapal di dom urang nan hu yaom yaok rituh trieu tal ty jien dong, dom urang nan jeng caong tut angan brei ka sruh gaiy kapal di drei, min meng nan mai tavak tavaiy gah harak gar, kayua dom gaiy ini rilo meng lac gaiy kapal di mikva urang kathaot, dom urang nan blei mai meng dom urang karei pandar dahlau, oh hu pambuak tal taka so lieu, oh hu harak gar, caik yau nan blaoh tabiak tasik min.”

Meng akaok thun mai tal ini, dom jabat, kapul chuc nang hu langyah, taong bhat taong hukum di dom gilai kapal ngak suan gah harak gar hanh chinh tal labaih lac 452 mbang haong yaom jien taong bhat 4 ty 116 trieu dong, dalam nan hu labaih 53 mbang hu pambuak tal dom bruk gilai tabiak tasik oh tut angan, đăng kiểm, oh hu harak adat brei taong mek ikan dalam tasik, taong phat 460 trieu dong.

Tukvak di anak tal, tinh Binh Thuan daok patui peih ngak catang dom bruk ngak pacang caga taong mek kaya ikan dalam tasik oh njauk hukum IUU, srap gap siam dom kein lagaih piah ngak bruk haong Kapul pasang iek di EC mbang ka 5, kuhria tame dalam bilan 11 anak tal./.