Saai Nguyễn Thị Hoa Bắc, daok di Quận 8, banraya HCM bhian blei pandap di mangaok web pablei salih online Taobao saong jaik di ini hu web Temu. Pandap saai Bắc blei di mangaok web ini bhian ieu lac yau ye khan aw, ngui cuk, pandap pandar kaya ngui di dalam sang yau ye mac bluh thu, pandap uak sang, gom truac ndih,… hu yaom meng 500 ribau dong tal 1 trieu dong sa pandap:

"Kayua pandap di mangaok web nyu gheih mata saong yaom lap, nan ye drei biak takre pandap di Trung Quốc. Ka oh ndem mayai tal bruk blaoh urang Việt Nam drei jeng mek pandap di Quảng Châu Cina mai pablei biak rilo labik. Urak ini, urang blei pandar di negar drei jeng caong blei tapa meng dom jalan web online di Trung Quốc ini piah oh tapa gah halei veik."

Daok saai Nguyễn Thị Bích di quận Bình Thạnh jeng bhian blei pandap nda di Trung Quoc min blei di mangaok Shoppee. Saai Bích brei thau lac, sa gu yau khan aw pasram yoga saai bahrau taduan hu hadei di 5 – 6 harei kakei blei, yaom tok 180.000 đồng/sayau sagu bộ  ngan haong janih pataih thun meng cotton lạnh, oh lahik jien jao pandap. Min jeng lac khan aw yau nan bo saai blei dalam negar yaom meda glaong jang 30% - 35%. Bruk blaoh saai Bích biak njauk hatai abih nan lac dich vu sangka ka urang blei pandap di jalan web ini:

"Dahlak mboh sa mbang nyu jao kurang sa pandap saong dahlak hu pathau khan haong web nan. Hadei di nan, nyu javap chaloi taduan bruk ngak suan di drei, ngak pasiam veik saong hu payua alin hadiah pandap kurang, gam haong di nan ieu lac alin veik 2 pandap kak mbuk veik nan ye drei biak takre."

Tuk kong nghe cak rok patagok yau jaman ini, tapa hala web pablei salih online, urang blei pandar meda hu rilo kein lagaih piah pilih ruah pandap rilo janih, yaom lap, dich vu siam saong hu chat luong pabak hu panuac ieu kakei. Ini lac cuang kandah biak praong ngan haong doanh nghiep ngak pandap dalam taneh ia tuk prein maraik gauk bo oh samu haong prein khang.  

Ong Phạm Quang Anh, CEO Công ty Chik khan ao Dony brei thau lac, pandap ngui cuk di Trung Quoc pablei tame Việt Nam ngan haong yaom lap, kayua nyu ngak biak rilo, pandap ngak hu blaoh ngan haong yaom biak lap saong hu sarak blei masaiy jien ngak pandap di nyu hu laba bier… Công ty di ong jeng bahrau maraik gauk haong 1 Urang ngak mbang blei salih saong taduan hu bruk ngak biak praong nan lac ngak tamo lưỡi trai, khan aw ngui cuk saram padhih sukan di urang blei pandar di Mỹ. Dalam nan, yaom tamo ini, Dony pablei barau 20 ribau dong sa baoh jeng mek hu laba. Bruk ini brei mboh doanh nghiep dalam taneh ia mayah patagok prein ngak ye jeng hu yaom lagaih piah maraik gauk haong pandap Trung Quốc yaom lap pablei tame Việt Nam. Min, oh njauk doanh nghiep halei jeng ginup prein piah ngak chip hu, nan ye caong hu bruk daong ba.

Di gah doanh nghiệp di TP.HCM, amuk Lý Kim Kim, Akaok Kapul Pandap mbang TP.HCM brei thau lac, anak bruk “báo động bhong” pandap Trung Quốc ngan haong yaom lap vil val yau urak ini ye jabat chức năng njauk peih ngak chip dom sarak.

 "Bruk camriep di abih lac di mangaok web online, jabat chức năng njauk paglaong pasang ieik saong pandar mek jien je ka pandap pablei tame Việt Nam bo ka oh kak jien je. Dalam tuk nan, doanh nghiệp dalam taneh ia pablei yaok pandap hagait jeng kak jien je. Kon drei caong hu dom sarak brei adat tantu cambaih laih ka yaok nyaom pandap di mangaok web pablei pandap tame darak pasa negar drei."

Dalam mbang maraik gauk biak catang ini, gah ngak pandap njauk paglaong prein maraik gauk. Gam tui di nan, jabat chuc nang njauk samar drah khik ramik, pasang iek ka pasiam pandap, sarak pablei pandap saong jien je,.. piah tani tanat prein maraik gauk biak siam lagaih. Sa bruk hu makna abih lac urang blei pandar njauk pilih ruah biak lagaih, hu kein laba piah tani tanat quyen di drei tuk blei pandap tapa web pablei pandap online. Urang blei pandar tuk blei pandap tapa web pablei pandap online njauk pilih ruah web hu brei harak adat pablei pandap tame nagar Việt Nam. Gam tui di nan, urang blei pandap njauk caik hatai mboh lagaih saong jia tame ye pilih mayah oh hu meda mbuan gaok rilo bala saong njauk padeih./.