Dalam tukvak blaoh tapa, Gilang pariak Karja mada pambuak haong Mentri Ngak nong saong Patagok palei pala saong 12 tinh, ban di ĐBSCL padang saong ba tabiak danak dak brei mesraiy jien mek laba takik di danak dak 1 trieu hecta padai mek hu yaom kaom siam glaong, tathuak nerak biar di bhum ĐBSCL tui pato tacei di Pedana mintri Thu tuong. Gah brei mesraiy ngan haong gah padai brah bhum ĐBSCL mek hu labaih 124.000 ty jien dong, hu labaih 53% jien tavak sraiy padai brah dalam nagar.

Menuac mesraiy ieu lac yaok akaok sa urang, yaok baoh sang urang ngak nong hu mbaok tame pambuak ngak mbang, ngak patabiak ndap nda saong pablei pandap panda padai brah; kapul pambuak bruk, hop tac xa, urang ngak mbang blei salih. Amuk Phùng Thị Bình, Phaok naeb panakaok taong abih Yam ndok Agribank brei thau, gilang pariak daok padang bruk brei mesraiy tal taong abih gah hu mbaok tame danak dak 1 trieu hecta padai mai meng dom baoh sang, urang ngak padai tal dom urang ngak mbang blei salih:

"Dahlak hulin jeng caong khin taong abih gah hu mbaok tame dalam mon pambuak bruk ngak mbang ini tuk mbaoh tangin pambuak gauk ye kol rei ba gauk ngak dom bruk piah ka danak dak ini hu siam lagaih".

Tui amuk Tạ Thu Thủy, Yam ndok Kong ti TNHH pablei tabiak blei tame Phương Thanh, tinh Đồng Tháp, danak dak ini daong gah padai brah hu paglaong chat luong, njauk haong dom tieu chuan di dom darak pasar dunya. Min, kadha makna di dalam danak dak lac urang ngak nong jeng oh ka mesraiy hu jien:

"Brei ka gah urang ngak mbang, pablei salih padai brah, urang ngak mbang blei salih daok caong khin hu jien din thumu piah meda mesraiy gap tukwak masa mbiah harei, suai harei piah patakik banah mesraiy katut harei bo duh hatai ka gah mesraiy tal abih harei đáo hạn, atau gah piah caga khik kajap dalam bruk pablei tabiak langiu nagar". 

Tuk hu mbaok tame danak dak, Đồng Tháp pagun sanya tal thun 2030 mada mek hu labaih 160.000 hecta, ong Phạm Thiện Nghĩa, Akaok UBND tinh Đồng Tháp brei thau, danak dak oh lac daong hu ka urang ngak nong paglaong jien mek tame, patagok karo kajap gah padai brah blaoh daok ba mai bruk hadah mbaok ka urang ngak nong brei ka bruk daong khik kajap pandap mbang, ngak tabiak padai brah siam saong pacang khik alam langik tasik moi truong.

"Abih tih dom urang ngak mbang blei salih brei marat hatai piah pambuak haong yaok mblang hamu, yaok baoh sang urang ngak nong tapa kapul HTX, labik nyaom pataom di Đồng Tháp ye kol drei ba tabiak bruk njom mbak piah ngak siam haong danak dak ini. Kol dahlak pataom tame padang siam jang ngan haong gah ngak nong di Đồng Tháp, gak siam jang haong danak dak bruk ngak nong saong pachreih urang ngak nong ngak tui".

Urak ini Mentri Ngak nong saong Patagok Palei pala gam haong 12 tinh pasang iek taong abih bruk rah tabiak di dom bruk ngak mbang pala drak di dalam danak dak pakat bhum palei piah ngak njauk haong hatai caong tuh ia brei ka padai, dom bruk ngak brei ka daong pajeng ba, pandar jamraik mac moc abih piah brei kein lagaih ka bruk pandar ilamu jammariak ngak padai siam jang. Dom bhum palei hu mbaok tame danak dak, khik kajap bruk bruk thumu njauk haong dom caik dak dalau quy hoạch; khik brei karo kajap ka yau gauk saong peih ngak bruk buh jien ka bruk randap haong langik alam salih di bhum ĐBSCL. Ong Trần Thanh Nam, thứ trưởng Mentri Ngak nong saong Patagok palei pala brei thau:  

" Jalan ngak pasak di danak dak lac padang gilac bruk ngak padai brah di ĐBSCL piah paglaong jien mek tame ka urang ngak nong, nan ye dalam bruk ngak tabiak mon pambuak ye kan abih lac ngak salih hatai sahaneng di urang pala padai saong urang ngak mbang pablei salih".

Danak dak “Patagok karo kajap 1 trieu hecta padai siam glaong, tathuak nerak biar pagam haong patagok cakrok hijao di bhum ĐBSCL tal thun 2030” haong jalan ngak padang veik gah padai brah, daong urang ngak nong paglaong jien mek tame, patagok khang kajap gah padai brah. Danak dak ba mai bruk hadah mbaok ka taneh ia palei nagar, ka urang ngak nong hu rik daong praong dalam bruk khik kajap karo salamat pandap mbang, ngak tabiak padai brah siam makre jang, pacang khik caga ka siam makrei dalam alam langik tasik moi truong, rik daong paglaong yaom kaom padai brah, brei mboh angan jie pandap panda, labik gah padai brah Viet Nam dalam darak pasar di dunya./.