Danak dak “Harei roya jum pataom dom bangsa” di labik daok di rahra thun 2024 dalam nan hu Ban khu pho 1-2-3, Phường 5, Quận 8 bahrau rah tabiak biak chreih chrai bui sambai haong 200 rakala hu mbaok tame. Ini lac sa dalam dom labik hu rilo bruk ngak naih njak caik hatai, dalam nan dom baoh sang mek hu angan Baoh sang ilamo hu labaih 98%; pachreih ba dom urang dalam umo thun nao ngak lin; jak ba rahra rik daong tame dom kadung jien jeng hu ginup saong tapa jalan ba tabiak, yau ye: Kayua Truong Sa hijao, Kayua Tasik pulao taneh ia – Kayua  gah akaok Negar, Kadung jien sangka urang praong thun umo…Abih 6 danak dak hu tut angan dalam thun ini, khu phố hu salah blaoh 100%, taduan hu bruk njauk hatai, ngak tui, chreih chrai hu mbaok tame di rahra.

Di Harei nyaom roya Jum pataom, rilo urang hu ndom meyai, ba tabiak rilo jalan langyah cambaih laih piah padang labik daok rahra jum pataom, khu phố ilamo. Amuk Bùi Thị Kim Oanh, Khu phố 2, Phường 5, Quận 8 brei thau, brei sangka rilo jang bruk pacang khuah padam khuah saog padang ngak labik daok hijao, hacih sa-at, gheih ghang, anit ranam:

"Dom mban, dom gah chuc nang tacei ba bruk ngak daong ka rahra thau saong ngak njauk adat ka pacang khuah padam khuah, ngak hacih sa-at alam labik daok. Yaok urang jakar ndang, urang dalam dom kapul brei paglaong bruk ngak, ba akaok nao dahlau saong jak ba rahra ba gauk ngak. Patagok hu bruk di dom baoh sang eng pasang iek dalam bhap bini, pambuak gauk, sa hatai padang, hu mbaok tame dom danak dak pakacah mek jak jeng piah salam uan dom harei roya praong dalam thun 2025".

Daok di Khu phố 4, Phường 10, Quận 3, Harei Roya Jum pataom dalam rahra rahtabiak hu ba tabiak rilo asal kadha lagaih salam uan harei pahadar 50 thun harei peih paha gah Meraong negar yasa taneh ia saong pamaong tal Harei Nyaom pataom Ndang bộ dom pakat. Dalam nan njauk ndem tal di abih lac bruk jhul khang salih số saong padang dom labik ilamo Ho Chi Minh di bhap bini, piah njom mbak hatai jum pataom saong pambuak pagam di bhap bini. Amuk Nguyễn Thị Hương, rahra daok di khu phố 4 brei thau, yaom lac bahrau padang ngak, khu phố ngak hu biak rilo bruk kayua hu bruk jum pataom di rahra. Njauk caik hatai sangka nan lac bruk siam mekre, saron mbon dalam rahra hu pasiam maong mboh cambaih laih:

"Dahlau daih, oh lac di bhum palei bo daok hu dom urang meng dom labik karei mai pak ini pataom gauk me-in jru phil, girum parah ban glai ban glo, madeih tagok page lac mboh. Min meng tuk Mat tran jak ba kapul pacang khik bhian nao pasang iek, urak ini bruk nan hu takik jang".

Min, jeng daok biak rilo kan kandah di anak. Hu rilo khu phố hu rilo baoh sang, rilo rahra min dom urang jakar ngak bruk di nan ye biak takik, rilo meng lac urang bahrau, atau dom urang umo praong thun, bruk pandar computer oh ka tanat. Kayua rilo labik bahrau padang ngak nan ye dom danak dak bruk ngak di khu pho oh ka hu mbaok tame rilo di rahra. Ong Nguyễn Minh Thế, Akaok Mban Bruk ngak Mat tran Khu pho 3, Phường 5, Quận 8 brei thau:

"Peih Ngak Sarak 11, dom urang ngak bahrau di khu phố jeng oh ka randap nan daok gaok rilo kan kandah, tukvak anak tal jeng pasiam veik urang jakar, brei bac megru, pathau khan daong dom gah daok kan kandah di urang ngak piah khu phố ngak bruk siam jang. Hu hatai jie tame di rahra tuk halei jeng rik daong prein yava saong jien padai, gah Bruk ngak Mat tran khu pho pathau khan saong bhap bini jeng njauk hatai, hu mbaok tame rik daong ba mai siam lagaih glaong."

Thun 2024 jaik abih, yam tapa thun 2025, dom khu phố di Ban raya Ho Chi Minh daok pataom prein tame jak ba gah daong prein piah sangka Tet ka baoh sang kathaot, jaik kathaot, kan kandah, khik kajap bruk oh klak thei gah likuk. Meng bruk jum pataom saong chreih chrai di mikva, dom khu phố khang hatai patui veik bruk pandar siam lagaih abih gah, abih di nyu nan lac gah praong glaong di mikva tuk halei jeng khang kajap, daong padang dom bhum palei saong ban raya Ho Chi Minh dak harei dak hu raidiuk siam, ilamo, bahrau, anit ranam./.