Meng akaok thun tal ini, Kapul Urang kumei daok di tỉnh Phú Yên pambuak haong dom pakat kapul brei paglaong bruk dakwah pathau khan, peih ngak rilo bruk piah peih ngak siam lagaih danak dak 8 – peih ngak bruk urang likei kumei yau samu gauk saong langyah dom bruk samar drah ngan haong urang kumei saong uranaih di bhum mikva urang bangsa takik. Kapul Urang kumei daok di tỉnh Phú Yên hu peih bruk brei tabiak mbaok 63 kapul dakwah pathau khan. Yaok bilan, kapul dakwah pathau khan ka rahra peih ngak takik di nyu 1 bruk pathau khan, parilo jalan dakwah pathau khan, pilih ruah dom janih pathau khan lagaih haong yaok manuac urang hu mbaok tame.  

Kapul pathau khan ka rahra hu nao tal yaok baoh sang urang bhap bini rahra piah pasang iek saong thau cambaih hatai sahaneng, hatai caong khin di mikva. Hadei di nan, meng pablak tame dom asal kadha dakwah pathau khan pambuak gam haong langyah dom cuang kandah ka rahra dalam dom mbang ginum biai di puk palei. Langiu di nan, kapul pathau khan ka rahra daok caik hatai sangka ieik glang tal uranaih, plaih nyaih bruk taong paoh gauk dalam sang saong pacang caga bruk tok gauk tuk ka tal umo thun tui njauk adat saong tok gauk dalam but pajaih; yah klak dom adat cambat ieu yang tuk njauk ruak saong dakwah pathau khan ka rahra nao tal labik y te piah iek ruak saong taong ruak. Adei Hồ Ngọc Kim Linh daok di xã Sơn Hội (huyện Sơn Hòa) brei thau:

"Adei caong hu mbaok tame Kapul dakwah pathau khan ini piah thau cambaih jang jeng ye plaih nyaih hu dom bruk chung suan. Bruk ini meda ba mai dom kein lagaih ka raidiuk saong meda lac ba mai ka adei thau rilo jang, ngak ka adei thau hagait njauk saong hagait oh njauk".

Tui amuk Hà Thị Thìn, Akaok Kapul Urang kumei xã Ea Trol (huyện Sông Hinh), dalam bruk kham marat pacang caga bruk tok gauk tuk ka oh tal umo thun tui adat hukum, tok gauk dalam but pajaih ralo darah, pacang caga, taong paoh uranaih, Kapul Urang kumei xa gam haong dom mban, dom gah, kapul nyaom xa hu trun tal dom puk palei piah dakwah pathau khan yaok bilan, yaok klau bilan sa mbang:

"Hadei di tuk taduan hu harak gar di pakat nagar jang yau di pakat tỉnh, huyện, ye Kapul Urang kumei jeng hu tagok jalan ngak. Hadei di nan brei peih ngak jalan ba tabiak ka dom puk palei di danak dak 8 blaoh drei meda ba hukum trun tal puk palei piah dakwah, yaok palei jeng hu peih ngak dom bruk urang likei kumei yau gauk samu gauk ye drei hu peih ngak bruk ndem oh haong bruk tok diuk pasang tuk ka oh tal umo thun tui njauk adat, tok gauk dalam but pajaih peih ngak 5 oh pablak dalam bruk peih ngak 3 hacih gam. Yaok klau bilan, yaok bilan lac drei jeng hu ginum biai dom urang kumei ye pathau khan gam bruk likei kumei yau samu gauk".

Tui amuk Nguyễn Thị Phương Liên, Phaok Akaok Kapul Urang kumei daok di tỉnh Phú Yên, tukvak masa blaoh, Kapul Urang kumei tỉnh Phú Yên hu pambuak haong Sở Lao động Thương binh saong rahra bhap bini Xã hội pakat tỉnh peih dom tal pasram piah paglaong ilamo ka urang jakar pakat huyen, xa ka ilamo langyah dom bruk pambuak tal taong paoh gauk, rapeik rapai urang kumei, uranaih di bhum labik mikva urang bangsa takik saong bhum ceik. Gam tui di nan jeng pato pakai ka dom pakat urang kumei di labik peih praong dom bruk ngak, dom jalan ngak naih yau jalan peih ngak dom bruk saong pandar siam dom bruk Kapul dakwah pathau khan dalam rahra bhap bini di Danak dak 8.

"Ngan haong jalan ba tabiak lac tal thun 2025 ye meda padang ngak hu 63 kapul ye urak ini hu padang ngak 45 kapul ngan haong 430 urang hu mbaok tame. Dom kapul ini hu Kapul urang kumei pasram ka dom ilamo saong bruk dakwah pathau khan ka dom urang dalam kapul."

Bruk peih ngak danak dak 8 lac kein lagaih piah ka Kapul Urang kumei dom pakat saong dom gah pambuak tal, kanja bhum palei jhul khang bruk sangka ka urang kumei saong uranaih bangsa takik, lac dom urang mbuan gaok kan kandah; jhul khang bruk ba kein lagaih piah yam tagok kan kandah, brei mboh bruk ngak di urang kumei, uranaih dalam bruk padang ngak saong cak rok patagok dalam rahra bhap bini, rik tame padang ngak di tinh Phu Yen cak rok patagok khang kajap./.