Ong Đỗ Trường Giang, Phaok Yam ndok Pasak Pathau khan, jirah rivang saong daong khik ramik, Bein pakat Negar Bù Gia Mập brei thau: “Kuhria tal ini, taong abih phun drap ar di Bein pakat Negar Bù Gia Mập jeng hu pagam QR. Ini oh lac sa bruk salih bahrau ilamo ky thuat jamraik, blaoh nyu daok ieu sa jalan ngak dalam bruk salih lek taka so pagam haong patagok jirah rivang sinh thai. Tapa bruk bah QR, tuai damuai meda hu sa gilang ilamo ka yaok janih phun meng angan dalam ilamo jamraik khoa hoc, asal sinh hoc, hu rilo di halei tal bruk yaom kaom piah ngak jru cavao di nyu, ilamo pagam haong phun glai. QR ieu lac sa bruk piah peih pambang ilamo, daong ka kol drei oh tok maong mboh glai blaoh daok thau saong anit ranam glai jang”.

Bruk pagam QR tagok phun glai daok ieu lac sa banah dalam thaik thaot taong abih ka jalan khik ramik bahrau di Bein pakat Negar Bù Gia Mập. Dalam thun 2025, bein brei patui veik peih praong bruk brei lek taka ka du lieu sinh hoc, pasiam dom ralaoh pato jalan, brei tapuk piah thau ka janih phun, janih jru chiat jien dalam glai saong patagok bruk khau tin ndom meyai taong yaom di dom jalan jirah rivang sinh thai. Ini lac dom jalan srap gap hu makna piah nao tal bruk padang bruk langyah labik tui jalan bahrau, dui pachreih tuai damuai tapa bruk ba drei tame tapak pambuak haong ilamo jamraik ngak kong.

Adei Trần Huyền Trang daok di xa Bù Gia Mập, huyen Bù Gia Mập brei thau: “Tok janih bah QR, adei meda puac hu ginup khau tin meng angan ieu, bruk lagaih di phun saong labik phun hu tamuh rilo. Bruk ini oh lac daong ka adei ta-eng bac blaoh daok meda khan gilac haong urang dalam sang, yut cuai sahabat, gaok mai lac tuai damuai meyah hu bruk nao haong gauk”

Bruk pandar ilamo ngak kong nghe ba QR tame pato megru dalam rahra jeng ieu lac sa bruk piah “talaih talei” khau tin ka glai tabiak di langiu harak tapuk. Rahra oh brei bac ka ndaom angan ieu tui khoa hoc, blaoh daok meda khan asal kadha ka glai tapa bah QR. Meng di nan, ilamo oh lac sa bruk di ta-eng urang roh duah atau urang tacei ba, blaoh daok ka grauk urang tuk halei jeng meda hu thau, brei thau saong pambak tabiak praong.

Amuk Huỳnh Thu Thủy, tuai jirah mai meng xa Hưng Thuận, ban sit Trảng Bàng, tinh Tay Ninh brei thau: “Lac urang bhian nao jirah rivang, dahlak hulin biak katuak saong chreih chrai tuk mboh dom ma QR hu pagam di angaok dom phun glai di Ben pakat Negar Bù Gia Mập. Ini ieu lac sa bruk ngak biak bahrau, oh lac daong ka tuai damuai mbuan si duah thau khau tin b blaoh nyu daok brei mboh chreih chrai dalam bruk ba drei tame jirah. Dahlak hulin sahneng ini lac sa bruk hadah krah biak njauk dalam bruk ngak jirah rivang sinh thai urak ini, abih di nyu nan lac biak hu kein lagaih ngan haong anek saih, sinh vien saong dom urang sit thun umo. Bruk ba ilamo jamraik ngak kong tame bruk pato megru yau nan daong rairah sit thun sit umo hu ilamo tui jalan maong mboh tapak saong mbuan hadar jang. Glai oh daok lac sa kadha kan si thau bo daok jeng sa tal bac lagaih, yaok sa phun lac sa kadha bac siam mekre, yaok mbang nao lac sa kein lagaih piah ka dahlak hulin bac mehru”.

Bruk njauk hu yaom glaong ieu lac dom urang sit thun sit umo lac dam dara dom urang ba rup ngak dahlau. Kapul ndoan dam dara, anek saih, sinh vien dalam dom mbang jirah rivang bac megru oh lac tok thau ka khau tin bo daok hu thaot binguk, thaot video clip ba tagok intenet mang xa hoi. Yaok sa kadha ba tagok lac sa bruk yaih khan ka glai tal bol bhap rahra praong jang, nan jeng lac sa bruk ngak tacei ba meng ilamo kong nghe saong meng bruk chreih chrai.

Dalam bruk khik glai, meyah yaok rahra yau ye asar sara pajaih ilamo QR lac sa bruk piah ka asar pajaih nan tamuh tagok. Saong tuk ilamo jeng sa prein khang ka taong abih gauk, glai oh daok sa drei jan dalam bruk khik taneh, khik ia, nagar khik bar hijao ka sa bhum palei tapen Negar. Yaok QR pagam di phun oh lac sa inem brei mboh bruk salih drei di Bein pakat Negar Bù Gia Mập bo daok lac jalan ba ilamo mai jaik jang haong bol bhap rahra. Meng dom yam takai duah thau di tuai damuai tal hatai chreih chrai di dom urang sit thun umo dam dara, glai oh lac tok sa janih hu maong mboh blaoh daok lac hu thau, hu pambuak saong hu khik ramik tui jalan biak bahrau di abih./.