
Huyen Xuyên Mộc urak ini hu 48 danak dak ngak jirah rivang hu tinh Ba Ria – Vung Tau mbaoh tangin ka jalan buh jien tame, hu taong abih labaih 741ha taneh, taong abih phun jien tut angan jaik 20.000 ty dong. Hu thau tal rilo lac dom danak dak: The Grand Hồ Tràm Strip – labik padeih padei 5 patuk pambuak casino akaok meti di Viet Nam; pambuak Melia Hồ Tràm at the Hamptons; labik jirah rivang Vietsopetro Hồ Tràm; Sài Gòn - Hồ Cốc; labik padeih padei ia craoh pandiak Bình Châu – Resort…
Ong Nguyễn Hữu Lộc, Phaok akaok UB Bhap bini huyen Xuyên Mộc, tinh Ba Ria – Vung Tau brei thau meng thun 2021 tal ini, huyen hu raok labaih mbang tuai, dalam nan hu jaik 414.000 mbang tuai damuai dunya mai jirah. Jien mek tame meng bruk jirah rivang dalam tukvak ini di huyen kuhria hu labaih 17.300 ty dong. Ini lac dom tanut biak siam, brei mboh labik dang dak harei dak tantu cambaih laih di huyen Xuyên Mộc dalam harak angan jirah rivang bhum gah Meraong negar. Tui ong Lộc, huyen daok salah blaoh jalan mbak, gom truac hadah, sang bac, balai pambuak bhum taneh, pambuak tinh…ieu da-a dom gah buh jien tame rilo ka gah jirah rivang:
“Tui bruk pak danak dak di tinh ye Xuyên Mộc jeng ieu da-a dom gah buh jien tame hu tung tian piah buh tame ngak labik pablei salih – meyit meyao – bein bingu me-in, Labik 10 ha ngak Pasak pablei salih, pandap mbang menyum di Hồ Tràm. Abih di nyu nan lac, huyen jeng hu dom ndap nda karei yau Labik kinh te malam, peih praong bein bingu tasik Hồ Tràm ngak jeng bruk lagaih piah padang peih ngak dom danak dak duh ka tuai damuai jirah saong rahra bhum palei”.

Daok di Ban Vung Tau, yam tal harei hadei lac jeng sa pasak jirah rivang hu bruk meyit meyao siam glaong, tanut chuan dunya. Ini lac jalan ngak lagaih di bhum palei, kayua urak ini hu rilo asal kadha karei ba mai ka Vung Tau sa kein lagaih piah patagok gah jirah rivang. Nan lac jalan mbak pambuak tinh, pambuak bhum jeng hu nao tal Ban Vung Tau yau ye: jalan peih samar Bien Hoa – Vung Tau, jalan tapen tasik nao tal Binh Thuan, jalan 992, jalan Quoc lo 51…biak lagaih piah ka tuai damuai mai tal Vung Tau.
Min, piah jeng sa pasak jirah rivang mek hu tanut dunya tui Sarak 24 di Trung uong ye Vung Tau brei pataom tame ngak rilo ndap nda jirah rivang, palagaih jalan mbak dalam bhum, pambuak dom labik meyit meyao, labik daok padeih padei saong patagok labik jirah rivang.

Tui ong Võ Thành Mỹ, Phaok Akaok Kapul Jirah rivang tinh Ba Ria – Vung Tau, meyit meyao gah jirah rivang tanut glaong oh lac tok duh ka tuai damuai hu jien mek tame glaong blaoh daok ieu lac duh hu ka tuai damuai oh hu rilo jien, piah ngak jeng ndap nda jirah rivang tanut glaong ye biak caong khin hu gah buh jien tame rilo:
“Tui dahlak hulin, tuk khol dahlak hulin caong khin hu dom danak dak jirah rivang njauk samu, ginup tanut ba tabiak, ginup bruk dui pachreih saong ginup bruk siam gheih piah khik takai tuai damuai ye tok hu dom gah pambuak bruk ciuk buh jien meng meda ngak jeng sa meyit meyao siam glaong. Ba Ria – Vung Tau brei dui pachreih dom gah buh jien tame hu ginup ilamo ye meng ngak jeng ndap nda ginup asar siam glaong saong siam gheih karei”.
Dom thun tapa, gah jirah rivang Ba Ria – Vung Tau hu salih bahrau rilo, tukvak 2021-2025, tinh kuhria raok labaih 64 trieu mbang tuai damuai, khik tani tanat bruk cakrok patagok kuhria rah tapa labaih 11%/sa thun. Bruk patagok khang ini oh lac daong jhul tagok bruk cakrok kinh te, paglaong thaik thaot siam gheih di bhum palei bo daok ngak jeng sa bruk karo kajap piah ka Ba Ria – Vung Tau uak drei tagok jeng pasak jirah rivang dang akaok di Viet Nam, lac sa labik jirah me-in danei angan dalam labik Asia Tenggara./.
Viết bình luận