Yaok page, mikva di dom palei Vơng Chép, Keo, Tung Ke daok dalam xa Ayun, huyen Chư Sê gam haong gauk ba tapol lamo di drei palao tabiak mblang taneh. Biar harei, urang patiaok lamo pataom tame sabaoh var. Tui sa-ai Đinh Suyn – Akaok kapul raong lamo menek, min nan lac daong yaok baoh sang raong karei. 2 thun ini mikva meng hu daong piah raong glang pataom. Đinh Suyn brei thau bruk daong saong padang raong glang meng brei kein lagaih piah mikva klah rabha ilamo, hatai bui sambai saong jalan ngak mbang: “Meng tuk Karja daong brei lamo, dahlak hulin jeng chreih chrai sambai ngak kaya meda, mai sang yuak hareik ka lamo mbang. Kayua lamo amaik daok metian saong dahlau hadei nyu jeng menek yau nan ye drei mboh biak bui sambai. Lamo menek ye drei raong, hadei meyah nyu menek rilo ye drei pablei piah mek jien blei khak drak, blei jru, blei phun pala”.

Tui sa-ai kpui Đe - Akaok kapul raong lamo menek, palei H’Vawk, xa Ayun jeng yau nan. Sa-ai brei thau, meng bruk duh hatai di tuk bahrau peih ngak, urak ini mikva biak njauk hatai: “Dalam hatian Đe mboh biak bui sambai rilo, dahlau daih amaik ame oh hu hagait, tal ini Karja daong ka drei lamo tal ini lamo menek nan drei kham merat raong ngak yau habar brei ka nyu siam jang. Yuak blaoh padai ye drei mek pong mai piah ka lamo mbang di bilan thu, jeng klah rabha pong ka mikva, oh daok cuh klak pong yau meng kal dahlau”.

Xa Ayun hu labaih 95% rahra urang bangsa takik, raidiuk kinh te gaok rilo kan kandah kayua taneh riya kurang janih siam saong langik oh lagaih, bruk raong lamo menek ba mai hatai caong takre bahrau. Dalam dua thun tapa, danak dak hu daong 65 baoh sang kathaot saong jaik kathaot dalam taong abih 327 baoh sang kan kandah di dalam xa Ayun. Tal ini, dom drei lamo hu daong meng thun 2023 tal ini hu menek, ba mai bruk piah duah jien bahrau, ngak patagok hatai je saong daong prein ka mikva.

Ong Phạm Ngọc Tuấn – Phaok akaok UB Bhap bini xa Ayun taong yaom: Danak dak oh sa janih padeih gilac di bruk daong brei bruk ngak mbang bo daok pamedeih hatai caong patruh kathaot, paglaong ilamo di rahra. Dom tapol lamo khang kadang, dom hatai bui sambai meng rai anek camreip hu menek hu brei mboh sa jalan ngak njauk.

“Hadei 2 thun ngak danak dak 3 daong raong glang ngak mbang, daong lamo menek hu dak harei dak siam lagaih. Hu raong glang tui kapul talei baoh sang ye ilamo di rahra hu tagok glaong, kacah gauk raong glang saong saong daong gauk iek glang, meng di nan mek hu dom jak jeng ralo jang dut tui  dom thun dahlau daih raong glang tui baoh sang ta-eng karei di gauk, bruk raong glang oh hu khik kajap ba tal siam lagaih oh yaom glaong.”

  Daong lamo menek piah mikva bangsa takik patagok bruk raong glang, parilo jien mek tame, ieu lac sa bruk hu ngak rilo thun di tinh Gia Lai saong brei mboh hu siam lagaih. Langiu di lamo pajaih ine hu blei meng phun jien danak dak jalan ngak pakat negar, rilo jabat dalam tinh jeng alin brei lamo menek, pabak veik prein ngak ka bruk patrun kathaot. Dom salih bahrau ka bruk raong saong jak jeng meng xa Ayun, huyen Chư Sê brei mboh, bruk ini di tinh Gia Lai daok ngak patui hu salah blaoh. Dom tapol lamo khang kadang, dom rai lamo anek bharau menek tabiak, oh lac ba mai rilo jien mek tame bo daok ngak pamedeih hatai kham merat uak drei patagok di yaok baoh sang rahra. Ini lac bruk lagaih piah dom pakat karja tinh Gia Lai daok patui peih praong bruk ngak, daok samar drah patrun kathaot di dom bhum palei./.