Bruk hu rilo urang pasang iek ruak hu BHYT di ban raya Ho Chi Minh oh lac rah tabiak di dom sang iek ruak praong puac di abih, blaoh nyu daok pambak praong tal rilo jabat di pakat huyen. Urang ruak lahik rilo tukvak dak talei cang pasang iek ruak, gaok mai lahik luac harei.

Meng hadah masup page, min hadei di 2 tuk pasang iek ruak, ong Lê Văn Tí (umo 80 thun, daok di huyen Bình Chánh) jeng oh ka tabiak truh di Sang iek ruak huyen Bình Chánh. Ong daok cang labaih 40 minit piah mek jru tui kat BHYT. Lac urang ruak man tinh labaih 15 thun pagam saong bruk pasang iek saong taong ruak di ini, ong Lê Văn Tí brei thau, yaom lac sang danaok ndap nda hu pasiam, bruk hu rilo urang mai pasang iek ruak daok rilo daok ngak ka tukvak cang dui atah: " Tame pasang iek ruak blaoh tabiak dak harak cang blei jru, gait cang 40 minit tal bih 1 tuk. Yaok rituh urang cang bo tok sa urang hu ieu angan mek jru blaoh daok mbaoh tangin 2 mbang. Urang taha oh thau angan drei daok di halei, tok yau nan bo urang hadei cang urang dahlau biak suai."

Dut saong tukvak dahlau thun 2018, tuk daok ngak bruk di labik klak, Sang iek ruak huyen Bình Chánh tok taduan labaih 800 – 1.000 mbang urang pasang iek yaok harei. Urak ini, dom urang mai pasang iek ruak hu tagok dua mbang, meng 1.600 - 1.700 mbang manuac urang, gaok mai tagok tal 2.000 mbang tame di dom harei tabung glaong.

Dreih yau nan, di Sang iek ruak Ban Thủ Đức, dom urang ruak hu kat BHYT jeng mai biak rilo meng hadah page masup awal, ngak ka dom labik di sang iek ruak biak ganik katiang. Talei atah urang ruak kham merat cang di dom labik pasang iek ruak saong labik mek jru. Anak bruk hu biak rilo urang, sang iek ruak hu pabak veik dom ndap nda pasang iek ruak. Sang iek ruak jeng rabha urang ruak di meng labik pambang jang. Abih di nyu nan lac, sang iek ruak daok peih bilik pasang iek ruak tui tukvak srap gap dahlau tapa phon dahlau atau taong phon tangin, mada daong patakik bruk kateik geik dalam tukvak tabung glaong. BS.CKII Hoàng Văn Dũng, Phaok Yam ndok Sang iek ruak Ban Thủ Đức brei thau lac: "Di gah brei bayar jru, khol dahlak daok dak harei dak peih ngak jalan pasiam lac tuk bac si hu ba tabiak angan jru di angaok angan ruak ndien tu, khau tin hu di gah brei jru khoa Dược, dom urang ngak hu blaoh dahlau. Tuk urang ruak ngak salah blaoh harak gar bayar jien trun tal khoa jru ye hu mboh jru caik blaoh.”

Dalam tuk nan, Sang iek ruak Ung buou Ban raya Ho Chi Minh jeng daok gaok kateik geik praong kayua urang ruak ung thu bahrau oh padeih bruk tagok rilo. Piah patakik kurang jang bruk nan, sang iek ruak daok pasiam tukvak pasang iek ruak saong pruh jru xạ trị meng samar drah jang, meng mon 5 tuk hadah page saong dui atah tal jaik meteh melam. Dom mbang traih blaic phau thuat langiu tuk ngak bruk saong pruh jru hoa tri di harei Sanecar jeng hu peih ngak piah patakik jang urang ruak dalam dom harei ngak bruk dalam adit.

Tui So Y te Ban raya Ho Chi Minh, hadei di tuk pagam tinh Binh Duong saong tinh Ba Ria – Vung Tau, Ban raya Ho Chi Minh bahrau mbuan gaok bruk hu biak rilo urang menuac mai pasang iek saong taong padam ruak daok dang di tanut njauk caik hatai. Piah ngak lagaih ka bruk ini, So Y te Ban raya Ho Chi Minh hu ba tabiak panuac brei ramik gilac bruk y te tui jalan hu rilo labik iek ruak, gam haong di nan brei patagok dom labik 2, labik 3 di dom sang iek ruak luac abih di dom labik taphia negar. So jeng ba tagok panuac likau pasiam jalan ngak buh jien tame tukvak 2026 – 2030, pabak 16 danak dak y te bahrau, patagok taong abih phun jien buh tame meng labaih 58.000 ty dong tagok tal labaih 65.000 ty dong.

Sa jalan langyah karei hu ndom mayai khang catang lac bruk pasiam gah jien padai hu lagaih piah dui pachreih saong khik takai hu kapul jru y bac si, dieu duong naih joi, abih di nyu nan ieu lac di dom labik bhum palei di tapen ban raya Ho Chi Minh./.