Meng 100 ha taneh ngak iek dahlau haong 2 hop tac xa akaok meti, tal bilan He thu thun ini, Tra Vinh hu peih praong bruk pala tagok jaik 11.000 ha di 6 huyen pala padai rilo, hu 47 HTX hu mbaok tame. Dom ilamo ky thuat bahrau yau ye takik pajaih pala, pruh ia tathah thu pablak gauk, pandar khak drak samu gauk, pandar jamraik samu gauk, pasang iek pong saong pandar tui jamraik ngak kong taka so hu daong patakik jien buh tabiak, paglaong asar siam saong takik tathuak nerak kayua sang kreih camin.

Ong Lê Văn Đông, Phaok Yam ndok So Ngak nong saong Alam langik tinh Tra Vinh, brei thau bruk ini ba mai rilo kein lagaih. Njauk di nyu nan lac, patrun 40% tal 50% tathuak nerak, daong pacang khik alam langik saong padang angan brah cih sa-at hijao: “Bruk ngak hu di dom bruk ini lac kein laba tagok meng 20% tal 30%, duo meng 6,5% tal 7,8 trieu dong/ha. Yang Ka dua lac trun hu janih nerak meng 40% tal 50%, daong pacang khik alam langik, padang angan brah hijao, takik tathuak nerak, daong tagok yaom kaom gah ndap nda padai brah di dalam tinh”.

Di HTX ngak nong Phước Hảo, xa Phước Hảo, huyen Châu Thành, bilan Dong Xuan meng blaoh lac mbang ka 3 danak gauk mek hu jak jeng lagaih. Bruk ini oh ba mai siam lagaih ngak mbang kinh te blaoh nyu daok daong pacang khik alam langik, ngak sa bruk ngak nong karo kajap.

Daok sa-ai Võ Minh Liệt, urang daok dalam HTX Ngak nong Phát Tài, xa Hưng Mỹ, huyen Châu Thành chreih chrai khan lac: Bilan Dong Xuan bahrau blaoh, padai di sang sa-ai hu 8 tan/ha, glaong jang 1 tan/ha dut haong hamu langiu di jalan ngak. Ngan haong yaom pablei 6.200 dong/kg, sa-ai mek hu kein lagaih jaik 40 trieu dong/ha, glaong jang labaih 10 trieu dong/ha dut haong pala tui jalan meng kal. Abih di nyu nan lac, oh duh hatai ka bruk pablei ndap nda: “Hu mbaok tame danak dak ye drei trun pajaih takik gilac, drei ngak tui jalan di danak dak ini, ia ye drei tathuak tui danak dak ye drei mboh phun padai oh jaleih. Patui veik jeng brei patakik khak, min gilac yuak hu rilo dut haong dahlau daih. Drei ngak tui danak dak ye padai nyu hacih sa-at oh hu tal piah pablei”.

Piah khik kajap bruk siam lagaih, gah ngak nong di tinh Tra Vinh pambuak haong Pasak Pachreih ngak nong pakat Negar tacei ba urang ngak nong taong abih jalan ngak padai asar siam, meng ilamo jamraik ky thuat ngak taneh, ruah pajaih, sangka, pandar khak drak tal langyah pong saong pacang caga halak haling. Dom kapul pachreih ngak nong jeng pasang iek, daong rahra ngak njauk jalan ilamo ky thuat saong duah labik pablei tabiak tani tanat ka ndap nda. Ong  Lê Văn Đông, Phaok Akaok So Ngak nong saong Alam langik tasik tinh Tra Vinh ndom mayai lac: “Bilan He thu thun ini di angaok bhum peih praong labaih 06 huyen, tuk hu mbaok tame danak dak, urang ngak nong brei pambuak haong HTX piah HTX ngak talei rohim nao mbaoh tangin ngak mbang, buh jien tabiak brei ndap nda. Gam tui di nan brei hu mbaok tame bac pasram saong janji pagun sanya ngak dom jalan ilamo ky thuat pala drak padai asar siam, tathuak nerak biar tui tacei ba di Kuk Pala drak saong Pacang khik phun kayau”.

Tui, danak dak thun ini, Tra Vinh brei pala drak di danak dak labaih 10.550 ha, pamaong tal bruk mek hu labaih 30.700 ha dalam thun 2030. Piah ngak hu bruk ini, tinh brei dak danak dak bhum ndap kaya tamo padang lek taka so bhum pala, jhul khang bruk patagok pablei salih saong daong gah ngak mbang pablei salih hu mbaok tame blei ndap nda. Ini lac bruk ngak hu makna piah Tra Vinh padang angan padai brah carbon biar, pabak hatai caong pablei dalam saong langiu negar, gam haong nan randap haong bruk langik salih karei saong pacang khik alam langik tasik./.