Saai Trần Vinh (xã Tân Hà) bac tamat đại học gah kỹ sư xây dựng mai palei ngak padai tui jalan hữu cơ

Saai Trần Vinh (xã Tân Hà) bac tamat đại học gah kỹ sư xây dựng. Yaom lac hu ngak tapa rilo Cty praong haong yaom jien bilan glaong min saai jeng patui hatai takre di drei haong gah ngak nong. Thun 2021, saai klaak TP.HCM, mai gilac veik palei.

Dahlau dieh, sang saai Vinh jeng yau rilo urang nong karei bhian tam, drak padai biak kapal nan ye hu rilo halak halin palai kaik. Urang nong njauk pandar rilo jru khik caga phun pala, rilo khak hóa học piah ka phun padai praong tagok. Bruk ini ngak brei takik cak rok dom vi sinh vật siam dalam taneh, ngak ka năng suất padai oh glaong. Taong abih dom bruk nan ngak ka saai Vinh saneng lac, ngak habar piah salih bruk bhian randap ngak yau meng lavik mai? Saai Vinh hu nao tal rilo bhum ngak padai praong piah duah thau saong bac megru jalan ngak bahrau. Urak ini, saai daok pandar bruk ngak padai tui jalan hữu cơ, jalan ngak ini ba mai kein laba dut saong bruk ngak padai yau meng kan.

Ong Đinh Hữu Dũng (daok di ban sit Đức Tài, huyện Đức Linh) lac sa dalam dom urang nong bhian ngak padai tui jalan ngak meng kan. Tuk pang saai Vinh brei thau hatai khin ngak padai tui jalan hữu cơ, ong Dũng oh ka jia tui, kayua ka oh mboh thei pala padai tui jalan hưu cơ. Min, hadei di rilo mbang jak ba saong pato tacei ilamo, ong Dũng pachreih hatai ngak tui. Meng thun 2021 tal urak ini, ong Dũng gam haong saai Vinh pala labaih 2ha padai tui jalan hữu cơ.

Bruk karei di pala padai tui jalan hữu cơ lac pandar abih khak var ro pa-auk. Jru khik caga phun pala jeng hu asal meng sinh học nan ye salamat ka urang ngak saong urang pandar. Tapa bruk ini brei mboh, phun padai hu ngak tui jalan hữu cơ nyu khang kadang meng akaok tal puac bilan ngak. Phun padai takik hu halak halin palai kaik, sambo asar padai jeng kanjik, hadah jang. Năng suất padai hữu cơ dalam dom vụ pala meng blaoh tuk halei jeng hu labaih 6 tấn sa ha.

Saai Nguyễn Hữu Nhơn (daok di ban sit Võ Xu, huyện Đức Linh) jeng lac sa dalam dom urang dam bac da-a glaong pilih ruah ngak nong piah padang mbang ngui. Meng puac thun 2021, saai ba pajaih padai ST25 tame ngak di mangaok mblang taneh praong 4.000m2, pandar taong abih khak var ro hu pa-auk piah buh. Mblang taneh padai ngak tui jalan hữu cơ di saai hu năng suất oh lah hagait dut song mblang hamu karei. Saai Nhơn brei thau: padai hu ba nao tal kapul độc lập piah pasang iek saong mek hu dom tanut chuan hữu cơ. Khol dahlak daok kuhria peih praong mblang taneh pala padai hữu cơ.

Bruk salih jalan ngak padai tui jalan hữu cơ hu daong ka urang nong di tỉnh Bình Thuận takik gaok bala, tagok năng suất padai, phun padai khang kadang, brah pahe bingi. Taphia di nan, bruk ngak ini daok patrun hu phun jien buh tame ngak padai ka urang nong./.

Urang lang: Thu Thao – 20/04