Mbaok danao saong praong atau sit di danao raong hadang: danao atah pak mata, mbaok danao praong labaih 2m, danao ia dalam 1,5m, tanut ia glaong labaih 80cm, dom danao meda pambuak haong gauk atau pacang jeng yaok danao tui jalan lubang pala phun li-u. Danao raong hadang oh tapan, njauk hu lanieng lanoi piah ka ia harei mbuan si pasang tame takik di nyu 30% mbaok danao.

Yaok danao raong hadang caong takik di nyu lac baoh brong meng xi măng piah caga dahlau tuk salih ia. Mayah dua baoh brong ye pabak ia, daok sa brong tra brei tathuak ia mai dua gah di danao raong hadang. Brong praong tui yaok danao raong jang yau prein salih ia ka danao di tuk yaok mbang ia tagok.

Hadei di yaok mbang raong, danao raong njauk kuac mek gluh di mala piah mek klak abih dom tal gluh daok kadaong di mala, janih ruak saong nerak, jru mek. Danao njauk pabu pandiak mala danao 1 adit, daong ka oxy mbang tame dom janih huu co daok veik di mala danao gam tui di nan jeng tathuak dom janih jru mek yau ye H2S, NH3 dalam mala mbaok danao. Pandar cur tapung piah ganap tani tanat pH di ia danao, ngak pasiam taneh njom likhun, patagok pH di mala, pasang iek dom janih tảo saong pametai dom janih oh siam di mala danao dahlau di tuk ba hadang tame raong.

Pandar dhar phun bần, trâm bầu atau kreim piah ngak pom. Dhan phun yuak mek abih hala saong ba pabu ka thu gatak bahrau saong atah labaih meng 1,5-2 m. Pabam klauk mblaing 30-45 độ jeng lubang atau kak jeng paok sit. Mblang taneh praong labaih 10-20 % mblang danao.

Pilih ruah pajaih siam, praong samu gauk, hu asal meng dom labik raong hu angan je. Palao pajaih meng 4-5 drei/m2. Pajaih dahlau di tuk palao trun danao njauk caik lagaih haong alam labik raong bahrau ka nyu randap (njauk caik hatai ka bruk oh samu gauk di nhiet do saong pH). Tukvak masa palao hadang siam di abih lac hadah page masup atau bier harei halui.

Pandap mbeng saong jalan brei mbeng: Pandar dua janih pandap mbeng nan lac pandap mbeng asal ngak kong saong pandap mbeng eng drei ngak dalam tuk raong.

Brei ka hadang mbang 2 mbang sa harei. Dom pandap mbeng brei mbeng di bier harei lac 2/3 abih tih dom pandap mbeng dalam harei. Brei ka hadang mbeng njauk rah tui tapen ar danao, jang yau brei mbang jeng rilo labik dalam danao saong brei mbang gam sa labik kayua hadang randap labik mbang.

Pandap mbang eng drei ngak hu: laning aik Trùng quế, ikan tasik, haleik, abao darang, arieng sit, mì, li-u. Pandap mbeng ngak tui yaok janih drei hadang praong atau sit. Pandap mbeng njauk that saong blei mbeng hasit hasit. Oh njauk brei ka hadang mbeng pandap labaih ngak nerak ia dalam danao raong.

Bruk palai dom janih nerak di hadang, pandap mbeng labaih, janih huu co meng gah langiu tame, tảo metai, meda ngak tabiak rilo dinh duong ka danao saong jeng ngak tabiak rilo janih jru mek karei meda ngak jhak tal hadang bo rilo abih lac janih di tal mala yau axit sunfuhidric, Amoniac.

Meda peih bruk kuac mek rilo mbang atau pataom mek sa mbang di tuk abih raong. Min, ngan haong hadang giraong hijao, kayua hadei di tukvak raong meng 3 tal 4 bilan, hadang bhian caih baoh. Kayua yau nan, pataom mek hadang rilo mbang hadang tano saong binai hadei di 4 bilan raong. Pilih ruah dom drei hadang hu baoh, hadang njauk ruak dahlau, dom drei binai saong tano hu prein praong tagok hu pilih caik veik piah raong, hadei dua bilan blaoh tathuak aia tabiak pataom mek hadang./.