Phun “phúc bồn tử jhuk” biak gheih, ba mai kein laba glaong hu dom sang rahra

Gam paik dom baoh “phúc bồn tử jhuk” tasak, sa-ai Trinh gam khan lac, bilan 6/2020 hu nao Đà Lạt (tỉnh Lâm Đồng) ravang iek bruk pala phun “phúc bồn tử jhuk” biak gheih, ba mai kein laba glaong hu dom sang rahra, dom trang trại pala pambak praong. Tapa duah thau, “phúc bồn tử jhuk” (daok ieu lac baoh mâm xôi jhuk), hu maong lac patao di dom janih baoh kayua hu rilo dinh dưỡng siam ka prein yava. Meng hatai takre pala dom janih njam, baoh kayau hu rilo chất dinh dưỡng, sa-ai Trinh kakei blei 250 phun pajaih mai pala iek. Tapa tukvak pala, mboh phun “phúc bồn tử jhuk” tamuh siam, lagaih haong langik tasik di Ninh Thuận, phun khang kadang, takik ruak kik halak halin.

Hadei di 8 bilan pala, phun paik hu baoh mbang camereip, baoh tasak jhuk jangaih, mbang mboh yamen, mesam, pahe, bingi, meng 80 tal 90 baoh tame sa kg, baoh siam saong pablei abih mbong. Mboh lac meda tagok hu kinh tế meng janih baoh bahrau ini di palei, sa-ai Trinh nao blei pabak 250 phun pajaih tra mai pala angaok taneh praong 1 sào dalam sang pacang halăm.

Sa-ai Trinh khan lac, phun“phúc bồn tử jhuk” hu baoh luac thun saong tukvak paik baoh dui atah jaik 10 thun meyah hu iek glang siam. Urak ini, sang sa-ai daok paik baoh “phúc bồn tử jhuk” yaok harei hu jaik 7kg baoh tasak angaok 1 sào, yaom pablei 150.000 đồng sa kg, daong ka sa-ai Trinh hu jien mek tame jaik 16 triệu đồng yaok bilan.

“Phúc bồn tử jhuk” lac janih phun takre hadah, mbuan pala, nhiệt độ lagaih lac meng 25 tal 32 độ C, jien buh tame tuk camereip jaik 50 triệu đồng. Piah ka phun tamuh siam, sa-ai Trinh ngak paga pandok, peng gai 2 gah var ro, talei ini atah talei daih 2 mét saong kak veik meng dom phun kreim haong talei, piah khik ka phun tamuh siam gah dalam.

Langiu di nan, sa-ai Trinh daok brei ngak jalan pruh ia “tự động ngầm”, jamriak duk nhiệt độ, độ ẩm dalam bein, buh khak hữu cơ saong pabak khak karei ka nyu lagaih haong tukvak phun tabiak baoh.

Meng jak jeng tuk camereip di bruk pala phun “phúc bồn tử jhuk”, dalam thun 2022, sa-ai Trinh daok kuhria peih praong taneh pala piah paik hu rilo jang baoh that, roh duah ilamu khik piah, ngak tabiak dom pandap meng janih baoh ini yau ye alak, siro, mứt… gam haong nan, padang angan pablei salih pandap phúc bồn tử Phan Rang, pambuak haong peih pabah mbang bein ka tuai tame ravang iek, paik baoh pak di bein piah dui pachreih tuai damuai.

Oh njauk lac tok pataom tame cakrok kinh tế sang drei, sa-ai Nguyễn Văn Trinh jeng halan hatian tacei pato, brei thau ilamu pala ka dom sang caong pambuak gauk pala piah cakrok kinh tế dalam palei. Ong Trần Ngọc Minh, Akaok UB bhap bini phường Văn Hải, ban sit Phan Rang - Tháp Chàm brei thau, bruk pala phun “phúc bồn tử jhuk” di sa-ai Nguyễn Văn Trinh lac 1 dalam dom bruk bahrau hu ba tabiak ngak dalam palei. Anak tal, palei daok brei pambuak bruk haong dom labik pala piah tui iek, ngak pasiam ilamu iek glang, roh duah, peih bruk pala phun “phúc bồn tử jhuk”, daong ka mikva cakrok patagok bruk ngak mbang, duah jien./.

Urang lang: Mousa Phương – 09/03