Rilo janih njam hu pala di taneh Hau Giang 

Bein njam pala dalam aia di sang amuk Lâm Thị Hoa, daok di puk 10, xã Thuận Hưng, huyện Long Mỹ. Nao rah tapa dom mejam njam that hijao, amuk Hoa drah tangin paik njam yar ka pasang teik kilo, dak tame kadung tui yaok đơn hàng, amuk bui sambai khan lac: “Pala njam dalam aia lac bruk daok biak bahrau ngan haong mikva dalam palei nan ye tukvak akaok mereip, sang dahlak gaok rilo kan kandah. Dahlak saong pasang duah thau, bac megru jalan pala di dom bein njam prong di Đà Lạt blaoh mai sang ngak tui. Jien buh tabiak ngak akaok mereip jaik 270 triệu đồng ka bein 350m2 min kein laba hu biak prong”.

Jeng tui amuk Hoa, pala njam dalam aia hu rilo siam lagaih yau siam ka môi trường, takik urang ngak saong siam ka pren yava di urang pala drak. Abih di nyu lac, kayua pala dalam sang kareih hu pacang abih vin taom dhar nan ye takik halak halin, oh pandar jru pacang khik caga phun pala nan ye pandap panda ngak tabiak hu urang blei pandar takre blei. Urak ini, bein daok pablei tabiak ka darak pasar dom janih njam mbang hala Đà Lạt yau: Xà lách Batavia, cải cầu vồng, cải romain, cải bó xôi, njam cần tây,... Yaok mbang pala jaik 60 harei lac paik pablei hu, daok cần tây jaik 75 harei. Bein njam di amuk Hoa pablei tabiak darak pasar jaik 200kg njam sa bilan, yaom pablei meng 50.000 đồng tal 65.000 đồng sa kg, tui janih.

Pan phun njam sabei bahrau paik blaoh daok that hijao, ong Phan Văn Tùng (pasang amuk Hoa), brei thau: “Njam sabei ini hu pala dalam nding lục giác chuyên dụng oh lac dalam nding katak. Yaok mbaik nding atah 6m, pala hu 30 phun njam. Sa mejam njam sabei hu 10 nding, meyah tamuh siam meda paik hu 30kg sa mejam. Taong abih bein hu 17 lô, abih tih hu 5.100 phun, paik tal halei, sang dahlak pala pabak phun anek tal nan, meng nan bo tuk halei jeng hu njam piah pablei tabiak darak pasar”.

Kayua langik tasik di Hậu Giang pandiak jang Đà Lạt nan ye piah ka njam hu tamuh siam, ong Tùng njauk ngak sang kareih ka nyu glaong jang piah laneng lanoi, bhian tui iek nhiệt độ, khik di tanut ala 30 độ C piah ka njam nyutamuh siam. Gam haong nan, pandar halam pacang piah trun pandiak dalam sang kareih dalam dom harei pandiak khang. Ong Phan Văn Tùng daok brei thau lac: “Asal pajaih hu pabam dalam dom giá thể hu caik peik la-u hu pilih ruah tani tanat. Tuk phun prong hu 3 caduk ye brei tagok mejam pala. Aia hadei di xử lý blaoh meda hu bơm tự động tagok hệ thống pabak dinh dưỡng ka njam. Yaok 1 tuk meda peih brei nduac sa mbang, daok melam ye yaok 2 tuk sa mbang”. Amuk Hoa brei thau: dalam bruk pala njam dalam aia, kadha prong abih lac halau aia saong lai srau hỗn hợp dinh dưỡng. Pasang iek khik brei ka phun tamuh siam di abih, oh pandar aia kraong atau aia  mac.

Meng dom siam lagaih yau nan, pala njam dalam aia daok jeng sa bruk daok hu palih ruah ka dom urang pala njam, abih di nyu lac ngan haong dom ban prong, ban sit. Pala njam dalam aia oh kan tuk ilamu, phun pajaih hu pablei bak langiu darak pasar, min bruk jak jeng siam mekre nan lac mai meng kham merat saong oh padeih bac megru, pasang iek tukvak cak rok di njam./.

Urang lang: Jasi -2/3