Ngak padai hữu cơ lac salih meng bruk pandar khak hóa học tapa khak hữu cơ, pandar ilamu ky thuat tame ngak padai daong trun jien buh tame ngak, ngak tabiak asar brah hacih, yaom glong, mbuan pablei tabiak negar langiu, daong patagok kein laba, tagok yaom asar brah ka urang ngak nong. 

Yau ye, bruk ngak padai tui jalan hữu cơ di HTX Ngak nong Phú Thọ, huyện Tam Nông di taneh hamu praong jaik 21 hecta, pandar pajaih padai OM 5451 saong pajaih padai Đài thơm 8 piah pala drak. Taneh hamu meda brei peih praong  dalam xã tagok 50 hecta, hu 41 baoh sang urang nong hu mbaok tame ngak.  Công ty cổ phần Tập đoàn Quế Lâm hu pabak pandap panda tame ngak yau: dom janih khak hữu cơ, chế phẩm sinh học, jru khik caga phun pala…saong blei veik taong abih padai ngak hu. Meng nan, daong ka urang nong sahanang hatai pala drak.

Bruk ngak nan hu brei mboh kein laba, khik caga alam moi truong, siam ka prein yawa urang pala drak. Pandar khak hữu cơ vi sinh dalam tuk pala padai, meng dom chủng vi sinh vật siam meda hu tame dalam taneh, ngak ralai gha nerang, ralai dom khak daok labaih, dom tal taneh jhak…Bruk nan ngak brei taneh pachoh, lac labik lagaih ka dom janih động vật siam ka taneh nyu cak rok. 

Tui ong Phan Hoàng Em - Phaok Yam ndoc HTX ngak nong Phú Thọ, tapa 2 mbang pala drak ngak padai hữu cơ, dalam bilan padai Hè Thu 2021, năng suất  hu meng 6,3 - 6,7 tấn sa hecta; bilan Đông Xuân 2021 - 2022 hu 8 tấn sa hecta. Kuhria rah tapa, padai yuak hu rilo jang meng  10 tal 15% dut saong jalan pala drak yau bhian ngak. Tuk ngak tui jalan pala drak hữu cơ, padai tamuh siam, gha kajap, takik hu halak halin, padai chroh nerang sumu gauk. Pandar khak hữu cơ vi sinh Quế Lâm daong dom chủng vi sinh vật siam meda tame dalam taneh, ngak bruk gha nerang, ralai dom khak daok labaih, dom tal taneh jhak…Tapa nan, ngak brei taneh pachoh daong ka phun padai tamuh siam, khik caga alam moi truong, siam ka prein yawa urang pala saong urang blei mbang.

Di huyen Hồng Ngự, sang ong Nguyễn Văn Minh daok di xã Long Thuận ngak padai hữu cơ ngan di mbang hamu praong 7.000 m², pandar pajaih padai ST 25, yuak hu labaih 6,5 tấn sa hecta, padai hữu cơ di ong Minh hu blei veik abih haong yaom 10.000 đồng sa kilo. Jien buh tame ngak padai hữu cơ trun meng 25 tal 30% dut saong jalan ngak meng dahlau diah. Kaoh abih phun jien buh tame ngak, daok laba hu labaih 5 trieu đồng angaok 1.000 m², rilo jang dua mbang dut saong jalan ngak padai buh khak hóa học.

Tui Sở Ngak nong saong Patagok palei pala tỉnh Đồng Tháp, bruk ngak padai hữu cơ ba  mai kein laba glong jang meng 2 tal 3 mbang dut saong jalan ngak nong yau dahlau daih, gam haong nan nyu peih tabiak jalan ngak kaya meda khang kajap, daong ka urang ngak hamu, HTX dak harei dak hu salih meng bruk pala drak tui jalan klak tapa ngak padai hữu cơ./.

Urang lang: Ai Nghiem -23/3/2022