Sa-ai Trần Hoàng Giao, umo 40 thun, daok di palei Ông Muộn, xã Lý Văn Lâm, Ban Cà Mau hu thau tal lac nao cagar veik bruk salih birau di urak ini tuk raong ada xiem (daok ieu lac ada kalapa)  oh brei mbang pandap mbang kong nghiep. Ini lac bruk raong ada hacih, tuk camreip hu laba tani tanat ka urang raong.

Sa-ai Giao khan lac: “ Bruk raong di dahlak tui jalan meng kan, dahlak takik pandar pandap mbang kong nghiep. Thau lac brei mbang pandap mbang kong nghiep ada samar praong, drah hu pablei min dahlak palih ruah bruk raong ada tui jalan brei mbang pandap hu di langik tasik piah khik siam prein yawa urang blei mbang.

 Yau nan min, yaom pandap mang kong nghiep urak ini di darak pasar biak chiat, meyah urang raong sit sot brei mbang pandap mbang kong nghiep ye laba oh hu hadom.

Sa-ai Giao daok brei thau lac, dahlak mek phun patei caok klik srau haong haleik brei ka ada mbang. Bruk pandar pandap mbang nan patak pataom hu rilo jien dalam tuk raong, rilo meng lac buh prein ngak laba. Meyah pandar pandap mbang meng phun patei saong haleik, kuhria rah tapa yaok mbang raong jaik 4 bilan, urang raong patak pataom hu jien blei pandap mbang meng 5 - 7 triệu đồng (tui bruk raong rilo atau takik), nan lac jien laba di urang raong. Ada xiem takik ruak, urang raong tok ngak var ro laneing lahei saong truac gom khik ấm ka ada lac hu.

Langiu di ada xiem pablei ralow, sa-ai Giao daok pablei ada pajaih. Tapon ada di sa-ai urak ini hu 15 drei mebaoh, jaik 100 drei pablei ralow. Yaok thun pablei tabiak darak pasar 1.000 drei ada pajaih, jaik 500 drei ada ralow. Tui yaom pablei urak ini meng 25.000 - 30.000 sa drei ada pajaih saong saong meng 80.000 - 95.000 sa kg ada ralow (tui tukvak). Ada sa-ai Giao raong lac janih biak trak nan ye hu urang blei biak takre, trak meng 4,5kg ngan saong ada tano saong meng 2,8 - 3kg ada binai.

Khak di ada, sa-ai Giao pataom mek, ba pambu thu buh ka phun pala biak siam., daok gah ala danao sa-ai raong ikan. Dom janih pandap sa-ai Giao pablei tabiak darak pasar jeng lac pandap hacih, siam ka prein yava urang blei mbang. Sa-ai Giao bhian ndom lac, sang drei mbang yau habar drei pablei yau nan, bruk siam mekre ka prein yava tuk halei jeng hu iek praong, ba tagok dang akaok.

Tui Kapul urang ngak nong xã Lý Văn Lâm, bruk raong ada di sa-ai Giao lac bruk hu laba, mek prein ngak laba nan ye oh cang buh tabiak rilo phun jien. Bruk raong ada meng lavik mai biak bhian randap haong bhum palei pala, meda ndom lac sang halei jeng hu raong. Mikva raong piah brei mbang dom pandap mbang labaih, piah sik ngak ralow mbang dalam sang, labaih ye pablei, oh cakrok praong. Daok meyah raong pablei, mikva bhian pandar pandap mbang kong nghiep ka ada praong samar, drah pablei nan ye laba oh hu hadom.

Bruk raong di sa-ai Giao oh bahrau, min jalan ngak lac bahrau. Meng bruk brei mbang phun patei caoh klik ye phun jien raong biak takik saong laba hu meng labaih 60% sa mbang raong, yau nan lac hu laba biak rilo. Ini lac bruk njauk pambak praong piah daong patrun kathaot ka bhap bini bhum palei pala./.