Danak dak “Padang bruk raong darko mek ia” di ban sit Ngan Dừa

Thun 2021, Kapul urang nong huyện Hồng Dân peih ngak danak dak “Padang bruk raong darko mek ia” di ban sit Ngan Dừa, labik hu rilo taneh pala phun khlàm saong phun mbang baoh, hu taong yaom lac lagaih piah cakrok bruk raong darko.

Kapul pambuak gauk Raong darko mek ia di ban sit Ngan Dừa tabiak rai tuk camereip hu 9 urang piah tacei pato gauk, bac megru ilamu haong gauk dalam tuk raong. Tapa phun jien meng Kadung jien daong urang nong, Kapul urang nong huyện Hồng Dân buh tabiak 54 triệu đồng daong ka mikva blei anek pajaih haong ngak thùng raong darko. Tuk hu mbaok tame bruk raong, mikva hu pato pasram meng bruk ngak thùng, ilamu iek glang tal bruk mek ia darko meng mac quay ly tâm, sơ chế saong khik piah ia darko....

Tui ong Huỳnh Thanh Nhơn, Akaok kapul pambuak gauk Raong darko mek ia, raong darko abih takik tukvak min brei gheih tangin saong tari taring. Piah raong darko hu kein laba glaong, urang raong brei pilih ruah pajaih siam, pilih ruah labik caik tapon darko, hu siphau piah cih, vak, tui iek yaok harei. Tok hadei di labaih 5 bilan raong, dom urang dalam kapul mek hu rilo ia darko siam hu yaom glaong, kayua ia darko tabiak meng tự nhiên nan ye hu urang blei biak takre.

Meng tame kapul pambuak gauk, dom sang raong darko hu taom gaok gauk bac megru ilamu saong hu pato pasram piah paglaong siam mekre iek glang tapon darko. Urak ini, ia darko hu pablei haong yaom 500-600 rabau đồng sa lít. Langiu di bruk pablei ia darko, dom sang raong daok hu pablei darko pajaih, meng nan mek tame hu rilo jien jang, tani tanat raidiuk.

Ong Trần Minh Lý, Phaok akaok kapul urang nong huyện Hồng Dân brei thau: Piah cakrok bruk ngak ini, Kapul hu ba mikva nao ravang iek, bac megru ilamu di dom palei raong darko hu jak jeng dalam bhum taneran kraong CL, jeng yau peih dom tal tacei pato ilamu raong darko mek ia.

Brei thau ka ilamu raong darko mek ia, sa-ai Nguyễn Tiến Dũng, sang raong darko di ban sit Ngan Dừa lac: Piah raong darko, camereip abih dom sang brei hu 1 mblang bein sit piah caik tapon darko saong pacang halui. Meda caik di labik hu bein phun mbang baoh atau bein rilo janih phun min labik nan brei hu phấn hoa. Meyah duk saong dom janih raong karei, darko oh njauk rilo janih ruak, nan ye jeng mbuan iek glang jang.

Piah pachreih urang nong dalam kapul buh jien tame patagok kinh tế meng raong darko mek ia, ong Phạm Tuấn Tài, Phaok akaok kapul urang nong tỉnh Bạc Liêu brei thau, gam haong bruk buh phun jien tapa Kadung jien daong urang nong dom pakat, Kapul urang nong tỉnh daok peih dom tal pato pasram, ba brei ilamu kỹ thuật; daong yaih khan, brei thau saong pambuak gauk duah labik pablei ka ia darko. Bruk ini biak lagaih piah cakrok patagaok angaok bhum pala darang di ban Bạc Liêu jeng yau dom bhum pala njam patam.

Meng kein laba di bruk raong darko di Kapul pambuak gauk raong darko mek ia di ban sit Ngan Dừa, rilo sang urang daok di tỉnh Bạc Liêu hu pilih ruah bruk ngak ini piah cakrok kinh tế sang, paglaong jien mek tame ka baoh sang./.

Urang lang: Mousa Phương – 06/04