Labik raong hadang công nghệ glaong praong labaih 30 ha taneh di dom xã Phú Thạnh, Phú Tân saong Phú Đôngdi saai Tuan

Dahlau dieh, sang saai Ngô Minh Tuấn raong hadang sú công nghiệp di mblang taneh praong labaih 02 ha, min kein laba oh glaong kayua njauk jit ruak. Meng thun 2015, mboh drei hadang công nghệ glaong yau lagaih, takik njauk ruak kik nan ye saai Tuấn khang hatai pah taneh hamu piah kruac danao, buh jien tame raong iek bruk ini. Meng thau rilo, hu ilamo, hu bac ta-a, hu thau meng báo, meng rayo, meng dom gah chuyên môn saai hu pandar tame bruk raong hadang công nghệ glaong, nan ye saai raong biak jak jeng. Tal urak ini, saai Ngô Minh Tuấn hu ngak po 5 labik raong hadang công nghệ glaong praong labaih 30 ha taneh di dom xã Phú Thạnh, Phú Tân saong Phú Đông.

Bruk raong hadang công nghệ glaong di urang nong bhum kaoh pulao ini oh lac hu mblang taneh raong praong bo daok hu ngak biak njauk tui tanut chuan piah ka anek hadang praong siam. Di mangaok mblang taneh ngak dom labik raong, saai hu kaoh tabiak labaih 20% mblang taneh piah padang ngak dom danao raong hadang, daning pacang hu ngak meng bê tông, ala hu tauk bạt, mbaok danao hu pacang halam; 80% mblang taneh daok viek lac dom danao halang pasiam ia tame, tabiak mek hu tanut hacih njauk tui bruk ba tabiak. Kuhria rah tapa yaok ha taneh raong hadang saai buh tame jaik 1,5 tỷ đồng.  

Tapa 6 thun kak kajap haong bruk raong hadang thẻ takai putih công nghệ glaong, saai Tuấn tuk halei jeng jak jeng, năng suất hadang hu meng 45-50 tấn/ha, glaong jang 2 mbang dut saong dom bruk raong hadang yau dahlau dieh, laba hu labaih 40%. Jak jeng abih di bruk raong hadang công nghệ glaong ini lac dom drei hadang diuk tal tuk mek pablei lac labaih 90% nan ye tuk halei jeng hu laba. Ndem tal dom bruk hu makna praong piah raong hadang công nghệ glaong hu jak jeng, saai Ngô Minh Tuấn brei thau: “Ka sa lac bruk raong, anek pajaih brei siam, njauk raong dalam ia hacih saong hu ginup ôxy, pasang iek labik raong yaok harei saong praong di abih lac njauk hu ilamo raong. Dut saong dahlau dieh ye bruk raong hadang công nghệ glaong ini takik gaok bala, oh hu jit ruak, biak salamat, sản lượng mek hu glaong jang”.

Di tukvak ini, dom labik raong hadang công nghệ glaong di saai Ngô Minh Tuấn lac sa dalam dom labik raong praong saong ngak siam abih dalam bhum ĐBSCL. Piah raong hu siam lagaih, saai hu pilih ruah 40 urang hu ilamo iek glang dom danao raong hadang; dalam nan hu 14 kỹ sư thủy sản hu ilamo glaong. Dahlau di tuk jit ruak tamuh tabiak, dom danao raong hadang ini yaok bilan taduan raok jaik 20 kapul tuai dalam taneh ia mai rivang iek, duah thau ilamo raong hadang công nghệ glaong. Meng kaka kajap haongg hadang thẻ công nghệ glaong, sang saai Ngô Minh Tuấn hu kaya mada saong hu ieu lac “tỉ phú kaoh pulao”, urang nong ngak mbang naih joi rilo thun gam. Ong Nguyễn Văn Đoàn, Bí thư Đảng ủy xã Phú Thạnh, huyện Tân Phú Đông daok brei thau lac: “Njauk ndem lac bruk raong hadang di saai Tuấn Hiền biak hu laba, mayah pambak praong hu saong khang kajap ye drei hadang di huyện Tân Phú Đông meda cak rok siam”.

Tui saai, tok hu drei hadang công nghệ glaong meng daong ka urang nong di bhum kaoh pulao salih bahrau raidiuk, min caong raong hu jak jeng, urang nong brei hu phun jien saong ilamo raong, saai Ngô Minh Tuấn daok brei thau lac: “Urak ini drei mboh hu kan kandah tuk langik tasik dak harei dak kajhak jhak, jit ruak rilo nan ye drei hu padang labik raong bahrau ngan haong bruk raong danao vil saong pacang tabung piah patrun patakik jit ruak. Tapa mek pablei 2 mbang mboh biak salamat. Urak ini mblang taneh drei raong bak abih,  drei meda peih praong jang, dom kỹ sư hu ilamo jeng halain hatain nao daong ka urang raong piah peih ngak bruk raong ini.”

Anak tal, saai daok pambak praong bruk raong ini saong daong ka rilo urang nong cak rok patagok bruk raong ini salih ka bruk raong hadang meng kan mbuan njauk rilo bala piah ba gauk ngak kaya mada mangaok bhum taneh palei drei./.

Urang lang: Thu Thao – 30/01