Bruk raong ikan bớp di Cần Giờ dak harei dak cak rok patagok

Atah di ni 5 thun, Nguyễn Trung Tiến (30 thun, daok di puk Thiềng Liềng, xã đảo Thạnh An, huyện Cần Giờ) padang sang danaok, taneh riya piah mesre jaik 500 triệu đồng saong khang hatai salih tapa raong ikan bớp. Buh jien ngak bè, phao lưới haong labaih 1 ribau drei ikan pajaih lac sa bruk biak mạo hiểm kayua raong ikan bớp lồng bè daok biak bahrau ngan haong bhap bini dalam palei. Gam raong  gam bac megru saong hu bruk daong tacei pato di dom urang nao dahlau, hadei di jaik 1 thun, tapa 2 vụ thu hoạch camariep, saai Tiến bayar hu jien masre di gilang pariak bo daok laba hu labaih 100 triệu đồng.

Po pajeng, dalam 5 thun raong ikan bớp di mangaok phao bè, yaok thun sang saai laba hu labaih 300 triệu đồng. Saai Tiến khan lac: dut saong dahlau daih ye urak ni jien mek tame meng 600 tal 700 ribau sa harei, bingi jang nao ngak pah. Thei hu rilo jien ye raong rilo, daok adei hu takik jien, adei raong tui prien di drei. Daok adei raong meng 1 ribau tal 2 ribau drei min.

Urak ni, bruk raong ikan bớp di Cần Giờ dak harei dak cak rok patagok, daong ka rilo sang salih mbaoh mata. Tui saai Võ Thanh Sơn, urang camariep peih bruk ngak mbang meng raong ikan bớp lồng bè, bruk ngak ni oh cang hu rilo ilamo, min brei hu rilo jien buh tame, yaok vụ meyah raong 2.000 drei pajieh, gam jien blei pandap mbang, brei hu  meng 1 tỷ tal 1,2 tỷ đồng/vụ. Yaok thun raong hu 2 mbang, yaok mbang laba hu meng 300 tal 400 triệu đồng. Min, vaktu jaik ni hu rilo manuac meng baoh taneh saong dom labik taphia nan tuh tabiak ini raong kaya ikan ngak ka bruk raong ikan bớp takik rilo jeng gaok kan kandah.

Hu thau, raong ikan cá bớp lồng bè di Cần Giờ urak ni daok lac bruk tamuh eng, saong labik raong jeng oh ka hu brei adat. Piah lang talaih dom kan kandah, daong ka mikva hu mbuan lagaih dalam bruk buh jien tame raong kaya ikan, Ub bhap bini huyện Cần Giờ hu pambuak haong dom sở, dom gah pok panuac tagok UB bhap bini ban raya brei ramik veik jalan pandar taneh tal thun 2020, dalam nan hu bhum raong kaya ikan di 12 canah kraong praong 2.674ha  mbaoh ia, bãi bồi. Cần Giờ jeng daok duah jalan brei pah taneh bãi bồi tapen kraong, tapen tasik hadei di tuk quy hoạch pandar taneh hu ban brei adat ngak. Gam tui di nan hu jalan daong pachrieh nong, pachrieh raong ikan daong ka mikva paglaong bruk raong ikan bớp di mangaok lồng bè. Ong Hồ Ngọc Thiện, akaok jabat Kinh tế, Ủy ban bhap bini huyện Cần Giờ daok brei thau lac: Urak ni langiu di bruk raong kaya ikan, huyện daok rok duah ba tabiak bruk du lịch mangaok lồng bè, langiu di raong ikan, pambuak du lịch haong lồng bè, ye tapa nan jeng ba jien tame ka mikva.

Tal vaktu ni, dalam huyện Cần Giờ daok hu labaih 20 baoh sang raong ikan bớp haong mangaok 460 lồng bè. Sản lượng yaok thun mek hu jaik 100 tal 120 tấn, kuhria tabiak yaom jien lac meng 16 tal 17 tỷ đồng/ sa thun. Peih ngak dom jalan daong patagok bruk raong kaya ikan, paglaong jien mek tame ka bhap bini dalam palei lac sa dalam dom bruk hu karja huyện Cần Giờ abih hatai sangka dalam vaktu tapa. Gam haong bruk raong hadang, raong hàu..., bruk raong ikan bớp lồng bè daok ba mai kein laba glaong, tuk camariep hu daong ka rilo mikva tabiak truh kathaot, yam tagok ngak mbang hu kaya meda, meng nan hu rik daong kinh tế - xã hội Cần Giờ salih mbaoh mata, cak rok patagok khang kajap dalam vaktu anak tal./.

(Urang lang: Thu Thảo - 18/03)