Van pabe ong Chun 

Ong Moong Văn Chun ndih tapui thun 1973, dalam sa baoh sang urang bangsa Khơ mú kathaot daok di palei Khánh Thành, xã Nậm Cắn, huyện Kỳ Sơn, tỉnh Nghệ An. Mboh lac adat pala drak saong labik daok oh tani tanat di urang Khơ mú nan lac makna ba tal kathaot rambah, ong Chun klah abih adat yau Yuan lac du canh, du cư nan saong salih tapa raong athun di sa labik.

Thun 2015, ong ramik pasiam bhum taneh ngak hamu ngak puh meng kan di sang drei, mesre jien di gilang pariak 30 triệu đồng blei 13 drei pabe pajaih. Meng tari taring bac megru, pandar ilamu tame bruk raong glang saong jalan pacang caga ruak, tapol pabe di ong Chun cakrok patagok khang kajap. Meng 13 drei pabe pajaih tuk akaok mereip, tal urak ini sang ong Moong Văn Chun hu sa van ro prong hu labaih 150 drei pabe, yaok thun mek jien tame hu meng 200 tal 250 triệu đồng.

Tuk hu phun jien dalam tangin, ong Moong Văn Chun peih prong van ro di sang drei. Meng dom héc ta akaok mereip, urak ini sang ong hu vang paga, pacang khik labaih 10 ha taneh mbon ceik klaak balau piah ngak labik palao raong 10 drei kubao saong 15 drei limo menek, brei jien mek tame meng 60 tal 80 triệu đồng yaok thun. Meng sa baoh sang kan kandah dalam palei, urak ini sang ong Moong Văn Chun jeng baoh sang ginup meda di xã biên giới Nậm Cắn, huyện Kỳ Sơn.

Ong Hờ Bá Chá, akaok UBND xã Nậm Cắn, huyện Kỳ Sơn brei thau: anak tal, xã pambak prong bruk raong pabe bo ong Chun daok ngak hu tabiak 3 puk palei biak kan kandah nan lac Noọng Dẻ, Pa Ca saong Khánh Thành piah bhap bani cakrok patagok bruk ngak mbang.  

Oh lac kareih camin hadah dalam bruk ngak mbang patagok kinh tế, sang ong Chun rilo thun hu karja palei brei angan lac baoh sang ilamo, tuk halei jeng ngak siam dom jalan ba di Đảng saong sarak di Karja. Ong hu Kapul urang nong, kapul urang dahlau diah ngak bol lin pal phao karong huyện Kỳ Sơn pok meyaom lac urang ngak mbang naih jioy rilo thun gam. Angan siam mehit atah, bruk raong glang di sang ong Moong Văn Chun hu rilo urang nong daok dalam saong langiu tỉnh mai rivang iek saong bac megru.

Meng sa baoh sang kathaot, meng thau pandar ilamu saong tari tareng ngak mbang, tal urak ini, sang ong Moong Văn Chun hu rai diuk tani tanat, padang hu baoh sang siam gheih, hu van ro khang kajap ngan haong yaok rituh drei pabe. Bruk kham merat yam tapa kathaot rambah di ong nan lac kareih camin piah ka dom baoh sang urang bangsa takik bhum glaong bac megru, rik daong patagok jien mek tame ka baoh sang saong ngak kaya meda angaok bhum palei di drei./.

Urang lang: Jasi-8/7