Thau ba ilamu tame bruk pala drak rong glang 

Mai rivang labik ngak mbang di sang saai Hùng, khol hulin biak tatuak drei kayua labik labua, trang trại prong bo dok lac ilamu ka bruk iek glang tapol limo. Trang trại prong labaih 5 sào hu parabha jeng dom labik brei ka bruk rong palimek limo, labik rong limo menek song labik ngak pandap mbang.

Piah patagok kein laba ka bruk rong glang, saai Hùng duah thau, bac megru jalan ngak kinh tế, hu mbaok tame dom tal pato pasram ilamu rong glang bahrau. Hadei di tuk pataom hu ginup ilamu, saai salih tapa rong limo piah pablei, tui jalan gam rong limo menek, gam blei veik dom drei limo lavang lavaih mai rong palimek bloh pablei tabiak drak pasa .

Dalam trang trại di sang saai bhian hu 30-40 drei limo, hu tuk tabung glong  tagok tal jiak  80 drei. Meng hu rilo limo prong rong kreik, saai pala labaih  1,5 ha hareik limen brei mbang pabak haong dom janih yaka nong karei  nan ye limo praong samar  song pablei gam gam. Abih di nyu nan lac dalam mbang pandiak bhang meng akaok thun tal ni, rilo mblang hareik dalam palei thu jaik abih ye bein hareik di saai jeng dok tamuh siam kayua hu ngak jalan pruh ia meng dahlau, dong ka tapol limo praong siam tani tanat.

Bruk ngak mbang rilo janih hu dong ka saai Hùng yam tagok tabiak truh kathaot. “Angan siam dane atah”, rilo mik va dalam palei mai taom saai Hùng piah bac megru duah thau song hu saai abih hatai tacei pato. Dom sang dok nyim saai blei pandap mbang ka athur saong khak drak ka phun pala. Mong mboh hatai khin ni, saai peih pablei salih  pandap ngak nong. Rilo urang kan kandah, saai dong ka urang hu blei tavak song brei mesraiy phun jien piah patagok bruk ngak mbang kinh tế sang, saong daok hu ba bruk ngak tani tanat ka labaih  16 urang dalam palei song yaom jien labaih 3 triệu đồng/sa bilan.

Ong Katơr Hoàng, Akaok kapul urang nong xã Phước Trung brei thau: Langiu di bruk ngak kinh tế naih joi, saai Hùng dok abih drei dong ka urang nong song rik dong pren yava padang ngak puk palei bahrau, lac kreik camin ka bruk kham merat yam tapa kan kandah piah ngak kaya meda angaok bhum palei. Meng bloh saai hu  huyện Bác Ái brei harak meyaom “Urang nong ngak mbang palei salih naih joi”./.

Urang lang: Hanipha -4/8