Ong Võ Văn Trưng lac urang nong akaok meti di tỉnh Hậu Giang ba phun dưa lưới tame pala dalam sang pacang halam njol 

Ong Võ Văn Trưng brei thau, dahlau diah, ong apah urang mai tut phấn meng tangin ka yaok bingu piah brei tabiak baoh. Min, jalan ngak yau nan gam abih rilo tukvak gam kan KHIK njauk tuk binguk chroh nan ye baoh ndam hu takik, baoh praong sit oh sumu gauk. Mboh danko meda njuk phấn ka bingu nan ye ong Trưng chap mai raong dalam sang pacang halam njol piah njuk bingu ka bein tamun dưa lưới min oh jeng. Puac di abih, ong Trưng nao Đồng Tháp blei danko pajaih negar langiu mai raong saong mek hu jak jeng. Ong Trưng brei thau:

“Hadei di tuk bingu chroh nerang ye ba sruh danko tame sang pacang halam njol ye anek danko nyu par nao njuk bingu. Dalam tuk danko njuk ia hani lac nyu thụ phấn ka bingu. Thụ phấn dalam 4 harei ye taong abih bingu dalam bein tamun ndam baoh abih, baoh gam jeng ralo jaik abih. Dahlau diah drei ngak meng tangin ye phun ndam baoh jaik 85% min. 

Ngan saong sa công taneh pala labaoh 2.500 phun tamun dưa lưới, tok hu dua sruh danko thụ phấn dalam 4 harei lac salah, khin samar drah jang ye brei rilo sruh danko jang. Meyah thụ phấn tui jalan klak ye phun dưa lưới tok brei baoh hu meng 2 tấn meteh tal 3 tấn angaok sa công, daok meyah brei danko thụ phấn ye brei baoh jaik 3,5 tấn, baoh tamun praong sumu gauk. Dahlau diah, yaok bilan tamun, ong Trưng brei apah urang tut bingu meng tangin abih 2 trieu đồng yaok sa công taneh, urak ini pandar danko thụ phấn ye oh abih jien.

“Meyah lagaih ye drei raong danko eng, daok oh hu ye nao blei di labik urang raong danko mek ia hani mai thụ phấn ka phun tamun. HTX jeng hu ba tabiak jalan ngak brei raong danko piah thụ phấn ka taong abih bein tamun di HTX, gam mek hu ia hani danko bingi tamo.”    

5 thun dahlau, ong Võ Văn Trưng lac urang nong akaok meti di tỉnh Hậu Giang ba phun dưa lưới tame pala dalam sang pacang halam njol saong pruh patak pataom ia tui cong nghe Israel. Dom thun jaik di ini, tua riya njom ia mbak di bhum taneran kraong Cuu Long dak harei dak khang, bruk ngak nan patak pataom hu ia tal 80% dut saong jalan pruh ia dahlau diah. Urak ini, ngan saong jalan thụ phấn ka tamun dưa lưới meng taphon danko, ong Trưng trun jien buh tame ngak saong patagok jien mek tame. Ong Trần Văn Tuấn, Akok Jabat ngak nong saong patagok palei pala huyện Phụng Hiệp brei thau: 

"Sa-ai Trưng roh duah, bac megru rilo labik saong hadei di nan ba tame ngak hu bruk raong danko piah thụ phấn ka phun tamun dưa lưới. Dalam tuk biến đổi khí hậu yau urak ini, karja palei kham daong ka urang nong piah ba tame pandar ngak tui abih dom bruk ngak birau, pandar dom ilamu công nghệ glong piah pambak praong dalam tukvak anak tal ngak tabiak pandap hacih".

Urak ini ong Trưng padang Hợp tác xã tamun dưa lưới Thuận Phát ngan saong 12 urang, pala jaik 2 hecta tamun dưa lưới dalam sang pacang halam njol, yaok bilan pablei tabiak darak pasar labaih 15 tấn tamun hacih yaom meng 30 ribau tal 35 ribau đồng sa kilo. HTX jeng daok ngak tui tanut chuẩn GlobalGAP piah kaya nong hu pablei tabiak negar langiu.

( Urang lang: Ái Nghiêm - 10/06)